(سرینگر) محکمہ موسمیات نے جمعرات کو جموں و کشمیر اور لداخ میں 23 سے 25 دسمبر تک برف باری کی پیش گوئی کی ہے۔ محکمہ موسمیات کے ایک اہلکار نے بتایا کہ فی الحال گریز، سونمرگ، زوجیلا-دراس میں ہلکی برف باری کی اطلاعات ہیں۔
اُنہوں نے بتایا کہ23-25 دسمبر کے دوران وسیع پیمانے پر برف باری کے امکان ہیں۔ ادھر سیاحتی مقام گلمرگ سرد ترین جگہ رہی جہاں کم سے کم درجہ حرارت منفی10.0 ڈگری سینٹی گریڈ ریکارڈ کیا گیا۔ محکمہ موسمیات کے ترجمان کے مطابق جموں وکشمیر میں 22 دسمبر تک موسم مجموعی طور پر خشک رہنے کا امکان ہے۔ انہوں نے کہا جموں وکشمیر اور لداخ میں25 دسمبر کو موسم کروٹ بدل سکتا ہے جس کے باعث ہلکے سے درمیانی درجے کی برف باری متوقع ہے۔ سرینگر میں کم سے کم درجہ حرارت منفی2.1 ڈگری سینٹی گریڈ ریکارڈ کیا گیا۔ واضح رہے گذشتہ شب سرینگر میں رواں سیزن کی سرد ترین رات ریکارڈ ہوئی تھی جب کم سے کم درجہ حرارت منفی3.9 ڈگری سینٹی گریڈ ریکارڈ ہوا تھا۔ سیاحتی مقام پہلگام میں کم سے کم درجہ حرارت منفی6.9 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی6.4 ڈگری سینٹی گریڈ ریکارڈ ہوا تھا۔
