امت نیوز ڈیسک //
کشمیر سے چل رہے آئن لائن نیوز پورٹل "ڈی کشمیر والا” جس کے مدیر فہد شاہ گزشتہ ایک برس سے قید میں ہیں، کی ویبسائٹ، ٹویٹر ہینڈل اور فیس بک پیج تک رسائی معطل کر دی گئی ہے۔ اس پورٹل کے سوشل میڈیا بیچ اور ٹویٹر ہینڈل کو معطل کردیا گیا ہے۔ "دی کشمیر والا” وادی کا ایک انگریزی نیوز پورٹل ہے جس کو سنہ 2010 میں مدیر اور بانی نوجوان صحافی فہد شاہ نے شروع کیا تھا۔ فہد شاہ عسکریت پسندی کے الزام میں پبلک سیفٹی ایکٹ کے تحت جیل میں ہے۔
فہد شاہ پر گزشتہ برس پولیس نے ضلع پلوامہ، شوپیان اور سرینگر میں مختلف مقدمات درج کرکے جیل میں رکھا تھا، تاہم انکو عدالت نے ضمانت دی تھی۔ البتہ ضمانت پر رہا ہونے سے قبل ہی ان پر سرینگر ضلع مجسٹریٹ نے پبلک سیفٹی ایکٹ عائد کرکے جیل میں بند کردیا۔ وہ گزشتہ مہینوں سے کپواڑہ جیل میں بند ہیں۔ اس نیوز پورٹل کی معطلی کے متعلق جموں کشمیر کے سابق وزیر اعلی اور پی ڈی پی صدر محبوبہ مفتی نے کہا ہے یہ کیسی شرمناک بات ہے کہ ایک نیوز پورٹل جو حق بات سامنے رکھتا تھا کو بھی خاموش کر دیا گیا ہے۔ فہد شاہ جو سچائی پر مبنی رپورٹنگ کررہا تھا آج بھی قید و بند ہے۔
محبوبہ مفتی نے سماجی رابطہ سائٹ ‘ایکس (X) پر لکھا کہ گودی میڈیا جو حکومت ہند کی طوطی بول رہا ہے کو فروغ دیا جارہا ہے۔ ‘دی کشمیر والا’ میں اس وقت چھ صحافی کام کر رہے ہیں اور اسکا دفتر سرینگر کے راجباغ میں واقع ہے۔ لیکن اب ان افراد کے روزگار پر بھی تلوار لٹک رہی ہے۔ اس ادارے میں نوجوان صحافی اور ویڈیو جرنلسٹ ہی کام کررہے ہیں۔
