امت نیوز ڈیسک //
جموں: پاکستانی فوج نے جنگ بندی معاہدے کی خلاف ورزی کرکے جموں وکشمیر کے ضلع سانبہ کے رام گڑھ سیکٹر میں بین الاقوامی سرحد پر بلا اشتعال فائرنگ کی جس کا وہاں تعینات بی ایس ایف جوانوں نے منہ توڑ جواب دیا۔ ایک بی ایس ایف ترجمان نے بتایا کہ پاکستانی فوج نے بدھ اور جمعرات کی درمیانی شب سانبہ کے رام گڑھ سیکٹر میں بین الاقوامی سرحد پر بلا اشتعال فائرنگ کی۔ جس کے باعث ایک فوجی جوان ہلاک ہوگیا ہے۔
انہوں نے کہا کہ وہاں تعینات بی ایس ایف جوانوں نے اس حملے کا منہ توڑ جواب دیا۔ بعض ذرائع کے مطابق پاکستانی فوج کی اس فائرنگ کے نتیجے میں ایک بی ایس ایف جوان زخمی ہوا ہے جس کو علاج و معالجے کے لئے ہسپتال منتقل کیا گیا۔ قبل ازیں پاکستانی فوج نے 18 اور 26 اکتوبر کو ارینہ سیکٹر میں بین الاقوامی سرحد پر فائرنگ کی تھی جس کے نتیجے میں بی ایس ایف کے دو جوان زخمی ہوئے تھے۔
واضح رہےکہ پاکستان کی جانب سے بین الاقوامی سرحد پر پچھلے 24 دنوں میں یہ تیسری مرتبہ جنگ بندی معاہدہ کی خلاف ورزی کی گئی ہے۔ اور تینوں مرتبہ بھی ہندوستانی فوج نے اس کا منہ توڑ جواب دیا ہے۔ فوج کے مطابق ماضی میں آئے دن پاکستان کی جانب سے جنگ بندی کی خلاف ورزی کی جاتی تھی۔
