امت نیوز ڈیسک //
سرینگر: جموں و کشمیر کے دوسرے اولمپین اور ضلع بارہمولہ کے رہنے والے سکیئر عارف خان نے دبئی میں ایف آئی ایس انٹرنیشنل سکی ریس کے سلیلم ایونٹ میں سونے اور کانسہ کا تمغہ جیتا ہے۔ خان نے یہ کارنامہ تین رنز کے بعد 51.98 سیکنڈ میں انجام دیا۔ اس نے پہلا رن 17.45 سیکنڈ میں، دوسرا 17.43 سیکنڈ میں اور تیسرا رن بھی 17.43 سیکنڈ میں مکمل کیا۔
دبئی سے بات کرتے ہوئے، خان نے کہا کہ "ایف آئی ایس انٹرنیشنل اسکی ریس میں ڈھلوان کی قسم کے پیش نظر بین الاقوامی ٹورنامنٹ ان کے لیے چیلنجنگ تھا۔ برف سے بنی تقریباً 200 میٹر کی مختصر ڈھلوانیں ہیں۔ سکیئر کے لیے پہاڑی سے نیچے جانا ایک چیلنج ہے۔ لیکن میں نے اسے تیسری اور چوتھی کوشش میں مکمل کیا۔”
ان کا مزید کہنا تھا کہ”پہلے دن میں ریس سے باہر تھا اور دوسری ریس میں، میں نے ٹاپ 10 میں جگہ بنائی۔ تیسرے دن میں نے ریکوری کی اور کانسہ کا تمغہ جیتا۔ آخرکار جمعرات کو جب چوتھی ریس کا انعقاد کیا گیا تو بھارت کی ٹیم پہلی پوزیشن پر آگئی اور پہلا بین الاقوامی گولڈ میڈل جیت لیا۔ اب میری نظر ایشین اور اولمپکس پر ہے۔
واضح رہے کہ سنہ 2021 کے نومبر مہینے میں عارف خان سلیلم ایونٹ کے لیے بیجنگ میں جگہ حاصل کرنے والے پہلے بھارتی ایتھلیٹ بن گئے اور ایک ماہ بعد، اس نے مونٹی نیگرو میں ہونے والے سرمائی اولمپک کے دیوہیکل سلیلم میں جگہ حاصل کرتے ہوئے تاریخ رقب کر دی۔(ای ٹی وی بھارت)
