امت نیوز ڈیسک //
پلوامہ (جموں کشمیر) :قومی تحقیقاتی ایجنسی (این آئی اے) نے جمعرات کو یو اے پی اے UAPA کے تحت جنوبی کشمیر کے پلوامہ ضلع میں اونتی پورہ کے چرسو گاؤں میں ایک رہائشی مکان کو اٹیچ کیا۔ موصولہ تفصیلات کے مطابق یہ رہائشی خورشید احمد بٹ اور ان کے پانچ بھائیوں کی مشترکہ ملکیت ہے۔ حکام کا کہنا ہے کہ انہوں نے مکان کو ایم اے 4 اسپیشل کورٹ جموں کے حکمنامہ سے UA(P)A کی متعلقہ دفعات کے تحت اٹیچ کیا ہے۔ تاہم اس ضمن میں مزید تفصیلات معلوم نہ ہو سکیں۔
یاد رہے کہ اس سے قبل بھی اونتی پورہ علاقے میں پولیس نے ایک دو منزلہ رہائشی مکان کو اٹیچ کیا تھا۔ اونتی پورہ میں اٹیچ کی گئی زیادہ تر غیر منقولہ جائیداد عسکریت پسندی یا علیحدگی پسندی کے ساتھ منسلک ہونے کے الزامات میں اٹیچ کی گئی ہے تاہم ایک منشیات فروش کے رہائشی مکان کو بھی اونتی پورہ میں گزشتہ دونوں اٹیچ کیا گیا تھا۔
واضح رہے کہ دفعہ 370 کی تنسیخ کے بعد جموں وکشمیر میں ملک مخالف سرگرمیوں کے الزامات پر مرکز نے جارحانہ پالیسی اپنا کر اب تک درجنوں مکانات زرعی اراضی کو اٹیچ کیا ہے۔ ادھر، جموں و کشمیر میں منشیات کے بڑھتے رجحان کو قابو کرنے اور منشیات فروشی کا قلع قمع کرنے کے لیے انتظامیہ نے منشیات فروشوں کے خلاف بھی نکیل کسنی شروع کر دی ہے۔ جموں و کشمیر کے طول و ارض خاص کر وادی کشمیر میں منشیات فروشی کے ساتھ وابستہ ہونے کے الزام میں نہ صرف رہائشی مکانات، اراضی کو اٹیچ کیا گیا بلکہ منشیات فروشوں کے بینک کھاتوں کو بھی منجمد کر دیا گیا ہے۔
