امت نیوز ڈیسک //
سرینگر: دہلی کے پٹیالہ ہاؤس کورٹ نے آج محبوس رکن پارلیمنٹ انجینئر رشید کو حلف اٹھانے کے لئے ایک روز کا کیسٹوڈیل پیرول دینے کا امکان ہے جس کے تحت ان کو تہاڑ جیل سے پارلیمان حلف اٹھانے کے لئے لایا جاسکتا ہے۔ انجینئر رشید کی سیاسی پارٹی عوامی اتحاد پارٹی کے ترجمان فردوس بابا نے کہا کہ انجینئر رشید کے وکیل نے ریگولر ضمانت کے لئے عدالت درخواست جمع نہیں کی ہے بلکہ حلف اٹھانے کے لئے کیسٹوڈیل پیرول کی عرضی دائر کی تھی۔
انجینئر رشید کے وکیل وکست ابرال نے پٹیالہ ہاؤس کورٹ میں گذشتہ ہفتے عبوری ضمانت کے لئے عرضی دائر کی تھی۔ عدالت نے قومی تحقیقاتی ایجنسی (این آئی اے) کو آج ضمانت پر جواب طلبی کا حکم دیا تھا۔ آج عدالت میں آین آئی اے نے اپنے دلائل پیش کیے۔ فردوس بابا نے انجینئر رشید کے وکیل وکست ابرال کا حوالہ دیتے ہوئے بتایا کہ کیسٹوڈیل پیرول کے مطابق ان کو تہاڑ جیل سے پارلیمان لایا جاسکتا ہے جہاں وہ حلف اٹھائیں گے اور پیرول کے شرائط کے مطابق ان کو واپس تہاڑ جیل لیا جائے گا۔
غور طلب ہے کہ انجینئر رشید نے جیل سے حالیہ پارلیمانی انتخابات میں جموں کشمیر کے سابق وزیر اعلی اور نیشنل کانفرنس کے نائب صدر عمر عبداللہ کو دو لاکھ سے زائد ووٹوں سے شکست دی ہے۔ انجینئر رشید پانچ اگست 2019 کے بعد قومی تحقیقاتی ایجنسی (این آئی اے) کی حراست میں ہیں۔ ان پر این آئی اے نے منی لانڈرنگ اور عسکریت پسند فنڈنگ کے الزام عائد کرکے تہاڑ جیل میں قید کیا ہے۔ تاہم پانچ برسوں میں این ائی اے نے انجینئر رشید پر عدالت میں چارج شیٹ داخل نہیں کی ہے۔ انجینئر رشید کے دو نوجوان فرزندوں نے ان کے محبوس والد کے لئے انتخابی مہم چلائی تھی جس میں ان کو رضاکاروں اور عام لوگوں نے کافی حمایت کی تھی۔
