مینڈھر پونچھ میں پراسرار دھماکے میں ایک شخص زخمی

امت نیوز ڈیسک //
پونچھ، 16 اگست:پونچھ ضلع کے مینڈھر سیکٹر میں جمعہ کو ایک پراسرار دھماکے میں ایک 45 سالہ شخص زخمی ہو گیا۔ عہدیداروں نے جی این ایس کو بتایا کہ مینڈھر سیکٹر کے قریب باڑ کے آگے ایک شخص جو اپنے مویشی چرا رہا تھا ایک پراسرار دھماکہ کے بعد زخمی ہوگیا۔

اس کی دائیں ٹانگ میں چوٹیں آئیں، انہیں فوری طور پر فوج نے ابتدائی طبی امداد دی، جس کے بعد اسے علاج کے لیے قریبی اسپتال منتقل کیا گیا جہاں سے اسے خصوصی علاج کے لیے فوجی اسپتال راجوری ریفر کیا گیا۔

اس کی شناخت محمد محفوظ (45) ولد خدام حسین ساکن ڈیری ڈبسی مینڈھر کے طور پر ہوئی ہے۔ مقامی لوگوں نے زخمی کو آرمی ہسپتال منتقل کرنے میں فوج کی بروقت مدد کو سراہا ہے۔

دریں اثنا، پولیس نے اس سلسلے میں ایک کیس درج کر لیا ہے اور تحقیقات شروع کر دی گئی ہے۔