امت نیوز ڈیسک //
جموں : جموں و کشمیر کے سرحدی علاقہ اکھنور میں پاکستان کی جانب ایک بار پھر جنگ بندی معاہدہ کی خلاف ورزی کی گئی۔ حکام نے بتایا کہ جموں کے علاقہ اکھنور میں سرحد پر پاکستانی فائرنگ کے نتیجہ میں ایک بارڈر سیکورٹی فورس (بی ایس ایف) کا اہلکار زخمی ہوگیا۔ پاکستانی فوجیوں نے بدھ کو سرحد پر ایک مرتبہ پھر جنگ بندی معاہدے کی خلاف ورزی کرتے ہوئے بھارتی چوکیوں پر بلااشتعال فائرنگ کی۔
انہوں نے بتایا کہ بی ایس ایف کے دستوں نے بھی جوابی کارروائی کی لیکن پاکستان کی طرف ہونے والی ہلاکتوں کا فوری طور پر پتہ نہیں چل سکا۔ بارڈر سیکوریٹی فورس کے ترجمان نے کہاکہ ’آدھی رات کے بعد تقریباً 2.35 بجے، اکھنور علاقے میں سرحد پار سے بلا اشتعال فائرنگ کی گئی جس کا بی ایس ایف نے بھرپور جواب دیا۔ اس دوران پاکستانی فائرنگ میں بی ایس ایف کا ایک اہلکار زخمی ہوا‘۔ انہوں نے کہا کہ فوجی دستے ہائی الرٹ پر ہیں اور بین الاقوامی سرحد اور لائن آف کنٹرول پر سخت نگرانی کررہے ہیں۔
واضح رہے کہ فوج نے پیر کو راجوری ضلع کے نوشہرہ سیکٹر میں لائن آف کنٹرول (ایل او سی) کے ساتھ دراندازی کی سازش کو ناکام بناتے ہوئے دو پاکستانی عسکریت پسندوں کو ہلاک کردیا۔ اس واقعہ کے بعد پوری ایل او سی پر چوکسی بڑھادی گئی ہے۔ عسکریت پسندوں کے قبضہ سے دو AK-47 رائفلیں، M-4 کاربائن بمع نائٹ ویژن، پستول، آٹھ دستی بم اور دیگر جنگی مواد برآمد ہوا ہے۔ جیسے جیسے جموں و کشمیر میں انتخابات قریب آرہے ہیں، پاکستان سے دراندازی کی کوششیں تیز ہوگئی ہیں۔ پہلے مرحلے میں ڈوڈہ، کشتواڑ اور رامبن کی 8 نشستوں اور جنوبی کشمیر میں اننت ناگ، پلوامہ، کولگام اور شوپیاں کی 16 سیٹوں پر 18 ستمبر کو ووٹنگ ہوگی۔
