امت نیوز ڈیسک //
سری نگر:نیشنل کانفرنس کے سینئر لیڈر اور رکن پارلیمان آغا سید روح اللہ کا کہنا ہے کہ اسمبلی میں دفعہ370 کے متعلق قرار داد کی منظوری ہماری جدوجہد کا ایک راستہ ہے جس کو آج کھول دیا گیا۔
انہوں نے یہ قرار داد منظور کرنے پر نیشنل کانفرنس اور اپنے ساتھیوں کا شکریہ ادا کیا۔
بتادیں کہ جموں و کشمیر اسمبلی نے اجلاس کے تیسرے دن بدھ کے روز دفعہ 370 کی بحالی کی قرارداد کو اکثریتی ووٹوں سے منظور کیا۔
موصوف رکن پارلیمان نے اس اقدام کے بارے میں یہاں نامہ نگاروں کے ساتھ کرتے ہوئے کہا: ’ہم نے پہلے ہی کہا تھا کہ اسمبلی میں معمول کے بزنس کے پہلے ہی دن اس قرار داد کو پاس کیا جائے گا،اسمبلی میں پہلا اور دوسرا دن معمول کی بزنس کا نہیں ہوتا ہے اور آج معمول کی بزنس کا پہلا دن تھا تو نیشنل کانفرنس نے وعدے کے مطابق اس قرار داد کو پیش کیا جس کو منظور کیا گیا‘۔
ان کا کہنا تھا: ’میں اس کے لئے اپنی تنظیم اور دوسرے ساتھیوں کا شکر گذار ہوں جنہوں نے اپنے وعدے کو پورا کیا‘َ۔
آغا روح اللہ نے کہا: ’بات یہاں پر ہی ختم نہیں ہوتی ہے یہ جدو جہد کا ایک راستہ ہے جس کو آج کھول دیا گیا‘۔
انہوں نے کہا: ’میں نے اپنی گنجائش کے مطابق پارلیمنٹ میں اس کے متعلق کوشش کی اور اب اسمبلی کے ذریعے یہ بات پہنچانے کی ضرورت تھی اور اس ضرورت کو آج پورا کیا گیا‘۔
ان کا کہنا تھا: ’اب یہ جدوجہد آگے لے جانے کے لئے کام کرنا ہے‘۔
موصوف رکن پارلیمان نے کہا کہ جموں و کشمیر اسمبلی کی اکثریت نے اس قرار داد کو منظور کیا۔
ایک سوال کے جواب میں انہوں نے کہا: ’سپیکر کے کام پر اگر بی جے پی ہمیں درس نہ دے اچھا رہے گا‘۔
