امت نیوز ڈیسک //
سری نگر: جموں و کشمیر کے ضلع بانڈی پورہ میں ہفتہ کے روز ایک حادثے میں چار فوجیوں کی جانیں گئیں، اور دو دیگر شدید زخمی ہوگئے۔
حکام نے بتایا کہ حادثہ ضلع کے ایس کے پاین علاقے میں اس وقت پیش آیا جب فوج کی ایک گاڑی سڑک سے پھسل کر گہری کھائی میں جاگری۔
زخمی اہلکاروں کو فوری طور پر مقامی ہسپتال منتقل کیا گیا اور بعد ازاں جدید علاج کے لیے سری نگر ریفر کر دیا گیا۔ ایک اہلکار نے بتایا کہ حادثے کے فوری بعد ریسکیو آپریشن شروع کر دیا گیا۔
بانڈی پورہ اسپتال کے ایم ایس ڈاکٹر مسرت نے بتایا کہ حادثے میں زخمی ہونے والے پانچ فوجی اہلکاروں میں سے چھ کو اسپتال لایا گیا ہے۔ "ان میں سے دو کو پہنچنے پر مردہ قرار دے دیا گیا،” انہوں نے کہا۔ "تین زخمیوں کو سری نگر کے ایک اسپتال میں ریفر کیا گیا۔ تاہم، ان میں سے دو، جو شدید زخمی تھے، دم توڑ گئے، جس سے مرنے والوں کی تعداد چار ہو گئی“۔
