امت نیوز ڈیسک //
وادی کشمیر میں جاری خراب موسمی صورتحال کے بیچ پیر پنچال کے آر پار بالائی علاقوں کے ساتھ ساتھ کچھ ایک میدانی علاقوں میںسال رواں کی پہلی برفباری ریکارڈ کی گئی جبکہ کچھ علاقوں میں ہلکی بارشیں ہوئی ۔ برفباری اور بارشوں کے باعث چلہ کلاں کی شدیدسردی نے لوگوں کو کپکپا دیاجبکہ کچھ ایک علاقوں میں برفباری کے باعث معمولات زندگی درہم برہم ہوکے رہ گئی۔ پہلگام ، سونہ مرگ ، گزیر اور گلمرگ کے علاوہ پیر کی گلی اور زوجیلا پر تازہ برفباری کے بعدسرینگر لہہ شاہراہ اور مغل روڑ پر ٹریفک کی آمد رفت معطل کر دی گئی ۔ ادھر محکمہ موسمیات نے اگلے 24گھنٹوں تک درمیانی درجے سے بھاری فباری کی پیشگوئی کرتے ہوئے بتایا کہ 06جنوری کے بعد دوپہر سے موسم میں بہتری آنے کاامکان ظاہر کیا ہے ۔ سی این آئی کے مطابق محکمہ موسمیات کی پیشگوئی کے عین مطابق اتوار کی صبح سے ہی وادی کے کچھ علاقوں میں ابر آلود موسم اور شدید ٹھنڈ کے بیچ بالائی علاقوں کے ساتھ ساتھ کچھ ایک میدانی علاقوں میںرواں سال کی پہلی برفباری ریکارڈ کی گئی جبکہ پہلگام ، ٹنگمرگ ، شوپیان ، بڈگام اور دیگر کئی علاقوںمیںرواں موسم کی تیسری برفباری ہوئی ۔ سنیچروار اور اتوار کی درمیانی رات سے ہی گلمرگ ، سونہ مرگ ، زوجیلا اور پیر کی گلی کے علاوہ پیز پنچال کی پہاڑیوں اور جنوبی کشمیر کے کے علاقوں میں برف و باراں کا سلسلہ شروع ہواجو آخری اطلاعات ملنے تک وقفہ وقفہ سے جاری تھی جبکہ شوپیان کے میدانی علاقوں سمیت شمالی کشمیر کے سوپور ، ٹنگمرگ اور بارہمولہ کے میدانوں علاقوں میں اتوار کی صبح سے برفباری کا سلسلہ شروع ہوا جو دن بھر وقفے وقفے سے جاری رہا ۔ جنوبی کشمیر کے شوپیاں ضلع کے پہاڑی علاقوں میں بھی بھاری برفباری ہوئی ہے۔ اسی دوران وادی کشمیر میں دن بھر موسم ابر آلود رہنے کے بیچ کچھ ایک علاقوں میں ہلکی بارشیں بھی ہوئی ۔
ادھر وادی کشمیر میں شبانہ سردیوں کا قہر جاری ہے ۔محکمہ موسمیات کے مطابق وادی میں رات کے درجہ حرارت میں تیزی سے کمی واقع ہوئی۔ محکمہ موسمیات کے مطابق کوکرناگ قصبے میں منفی8.1 ڈگری سیلشس ڈگری درج ہوا جبکہ سرینگر میں پارہ منفی 2.5 ڈگری سیلشس کے نیچے رہا۔ محکمہ موسمیات کے مطابق شہرہ آفاق گلمرگ میں کم سے کم درجہ حرارت منفی 4 ڈگری سیلشس جبکہ سیاحتی مقام پہلگام میں کم سے کم درجہ حرارت منفی 3.2 ڈگری سیلشس درج کیا گیا۔انہوںنے کہا کہ اس کے علاوہ قاضی گنڈ میں کم سے کم درجہ حرارت منفی 3.6 ڈگری سیلشس ریکارڈ کیا گیا جبکہ پامپور شہر کے کونیبل میں منفی 3.5 ڈگری ریکارڈ کیا گیا۔ادھر محکمہ موسمیات کے مطابق پیر پنچال کے آر پار اگلے 48گھنٹوں تک میدانی علاقوں کے ساتھ ساتھ بالائی علاقوں میں بھی برفباری ہونے کے امکانات ہے اور کہا کہ موسمی صورتحال میں 06جنوری تک جو ں کی توں رہے گی جبکہ اس کے بعد ہی موسم میں بہتری آنے کی امید ہے ۔ محکمہ موسمیات کے مطابق بالائی علاقوں کے ساتھ ساتھ میدانی علاقوں میں کہیںکہیں پر ہلکی سے درمیانہ درجے کی بارشیں ہوسکتی ہے جبکہ سوموار تک وقفہ وقفہ سے ہلکی بارشوں کی وجہ سے درجہ حرارت میں مزید گراوٹ آسکتی ہے۔
