سوپور انکاؤنٹر میں زخمی فوجی دم توڑ گیا، آپریشن جاری

امت نیوز ڈیسک //
سوپور، 20 جنوری: سوپور کے زلورہ کے گجر پتی علاقے میں ملی ٹینٹوں اور سیکورٹی فورسز کے درمیان تصادم میں زخمی ہونے والا فوجی اہلکار زخموں کی تاب نہ لاتے ہوئے چل بسا۔ اس علاقے میں کل دیر شام انکاؤنٹر شروع ہوا۔

ایک اہلکار نے نیوز ایجنسی – کشمیر نیوز آبزرور کو بتایا کہ آپریشن کل رات اندھیرے کی وجہ سے روک دیا گیا تھا۔

اہلکار نے کہا کہ "دن کی پہلی روشنی کے ساتھ، تازہ فائرنگ کا سلسلہ دوبارہ شروع ہوا۔ اس کے بعد ہونے والے تصادم میں ایک فوجی زخمی ہوا اور اسے اسپتال منتقل کیا گیا۔” انہوں نے بتایا کہ زخمی جوان اسپتال میں زخموں کی تاب نہ لاتے ہوئے دم توڑ گیا۔

اتوار کو فوج، سی آر پی ایف اور پولیس کی مشترکہ ٹیموں نے گجر پتی علاقے کو گھیرے میں لے لیا جس کے دوران ایک ٹھکانے کا پردہ فاش کیا گیا۔ "تلاشیوں کے دوران، سیکورٹی فورسز کی ٹیم پر فائرنگ کی گئی، جس کے نتیجے میں تصادم ہوا۔”