امت نیوز ڈیسک //
شوپیان : جنوبی کشمیر میں ضلع شوپیاں کے ہبڈی پورہ علاقے میں سیکیورٹی فورسز نے ایک بڑی کارروائی کے دوران سڑک کنارے نصب شدہ امپرووائزڈ ایکسپلوسیو ڈیوائس (آئی ای ڈی) برآمد کر کے اسے ناکارہ بنا دیا۔
سیکورٹی فورسز نے دیسی ساختہ بم (آئی ای ڈی) کا بروقت پتہ لگاتے ہوئے ایک سانحہ کو ٹال دیا۔ حکام نے بتایا کہ ایک گشتی پارٹی نے کولگام ضلع کے قائمہ کے مقام پر شوپیاں-اننت ناگ سڑک پر ایک مشکوک چیز دیکھی جو آئی ای ڈی نکلی۔ انہوں نے بتایا کہ بم ڈسپوزل اسکواڈ کو موقع پر پہنچایا گیا جس نے بغیر کسی نقصان کے آئی ای ڈی کو موقع پر ہی ناکارہ بنا دیا۔
ذرائع کے مطابق، نامعلوم عسکریت پسندوں نے شوپیاں-زینہ پورہ سڑک پر آئی ای ڈی نصب کیا تھا، جس کا مقصد سیکیورٹی فورسز کو نشانہ بنانا تھا۔ تاہم، مستعدی کا مظاہرہ کرتے ہوئے فورسز نے وقت رہتے اس دھماکہ خیز مواد کا پتہ لگایا اور بم ڈسپوزل اسکواڈ کی مدد سے اسے بحفاظت ناکارہ بنا دیا۔
کارروائی کے دوران فوج، سی آر پی ایف اور جموں و کشمیر پولیس کے اہلکاروں نے علاقے کو گھیرے میں لے کر کئی گھنٹوں تک ٹریفک کی آمدورفت معطل رکھی، تاکہ لوگوں کو کسی ممکنہ خطرے سے محفوظ رکھا جا سکے۔ آئی ای ڈی کو ناکارہ بنانے کے بعد، سیکیورٹی فورسز نے علاقے میں تلاشی مہم بھی چلائی، تاہم اس دوران کسی گرفتاری کی اطلاع موصول نہیں ہوئی۔
سیکیورٹی حکام کا کہنا ہے کہ عسکریت پسندوں کی جانب سے امن و امان کو نقصان پہنچانے کی کوششوں کو ناکام بنانے کے لیے مستقل نگرانی اور چوکسی برقرار رکھی جائے گی۔
