امت نیوز ڈیسک //
اننت ناگ : منشیات کی اسمگلنگ کے خلاف جاری کریک ڈاؤن کے ایک حصے کے طور پر اننت ناگ پولیس نے دو بدنام زمانہ منشیات فروشوں کی 75 لاکھ روپے مالیت کی غیر منقولہ جائیداد ضبط کی۔ حکام کے مطابق یہ کاروائی این ڈی پی ایس ایکٹ کی متعلقہ دفعات کے تحت کی گئی۔
آفیشلز کے مطابق این ڈی پی ایس ایکٹ کی دفعہ 68-ایف کے تحت کارروائی انجام دیتے ہوئے، پولیس نے ایک کنال اراضی کے ساتھ سیمنٹ کنکریٹ کا ایک پلنتھ منسلک کیا جس کا تعلق سٹکی پورہ علاقہ کے رہنے والے طارق احمد لون ولد محمد مقبول لون سے ہے، حکام نے منسلک کی گئی جائیداد کی قیمت تقریباً 60 لاکھ روپے بتائی ہے۔
پولیس کے مطابق مذکورہ جائیداد منشیات کی اسمگلنگ کے ذریعے غیر قانونی طور پر حاصل کی گئی تھی۔ ملزم این ڈی پی ایس ایکٹ کی دفعہ 8/20 کے تحت ایف آئی آر نمبر 48/2019 میں ملوث ہے، جو پولیس اسٹیشن سری گفوارہ میں درج ہے۔
اسی طرح کی اور ایک کارروائی انجام دیتے ہوئے پولیس اسٹیشن بجبہاڑہ کی ٹیم نے واگہامہ علاقہ سے تعلق رکھنے والے گلزار احمد راتھر ولد غلام رسول کے دکانوں کو منسلک کیا۔ حکام کے مطابق یہ جائیداد این ڈی پی ایس ایکٹ کی دفعہ 8/20 کے تحت ایف آئی آر نمبر 227/2024 کے سلسلے میں منسلک کی گئی، جو پولیس اسٹیشن بجبہاڑہ میں درج ہے، جس کی قیمت 15 لاکھ روپے ہے، پولیس کے مطابق مذکورہ جائیداد منشیات سے متعلق سرگرمیوں کی آمدنی سے حاصل کی گئی تھی۔
