امت نیوز ڈیسک //
سری نگر،: پیپلز ڈیموکریٹک پارٹی (پی ڈی پی) کی صدر محبوبہ مفتی نے بدھ کے روز پہلگام میں ہوئے دہشت گرد حملے کی سخت الفاظ میں مذمت کی ہے، جس میں زیادہ تر سیاحوں سمیت 26 افراد جاں بحق ہوئے۔
سری نگر کے گھنٹہ گھر میں احتجاج کے دوران میڈیا سے بات کرتے ہوئے، محبوبہ مفتی نے گہرے رنج و غم کا اظہار کیا اور کشمیری عوام کی جانب سے پوری قوم سے معذرت پیش کی۔
انہوں نے کہا، ’’معصوم سیاحوں پر حملہ صرف جانوں پر حملہ نہیں بلکہ کشمیریت پر حملہ ہے۔ ہم اس کی شدید الفاظ میں مذمت کرتے ہیں۔ یہ ناقابل برداشت ہے۔‘‘
محبوبہ مفتی نے مرکزی وزیر داخلہ امت شاہ، جو اس وقت کشمیر میں موجود ہیں، سے مطالبہ کیا کہ وہ حملہ آوروں کی جلد شناخت کر کے انہیں انصاف کے کٹہرے میں لائیں۔ ’’وزیر داخلہ یہاں موجود ہیں، انہیں چاہیے کہ وہ فوری کارروائی کریں تاکہ مجرموں کو ان کے کیے کی سزا ملے،‘‘ انہوں نے کہا۔
اس حملے کو ’’بزدلانہ‘‘ قرار دیتے ہوئے انہوں نے کہا، ’’لوگ کشمیر کی خوبصورتی اور امن دیکھنے آتے ہیں، لیکن اس حملے نے اس شبیہ کو داغدار کر دیا۔ کشمیر کو اس واقعے پر شرمندگی ہے، اور ہم اس بحران کی گھڑی میں قوم کے ساتھ کھڑے ہیں۔‘‘
محبوبہ مفتی نے کہا، ’’میں اپنی قوم کے لوگوں سے اس سانحے پر افسوس اور معذرت کا اظہار کرنا چاہتی ہوں۔ ہمیں اس پر بہت دکھ ہے۔‘‘
