امت نیوز ڈیسک //
نئی دہلی : ایئر چیف مارشل امرپریت سنگھ نے دفاعی شعبے میں بڑے معاہدوں میں تاخیر پر ناراضگی کا اظہار کیا ہے۔ ان کا کہنا تھا کہ معاہدوں پر دستخط ہوتے ہیں لیکن ترسیل (ڈیلیوری) شروع نہیں ہوتی۔ انہوں نے یہ تبصرے وزیر دفاع راج ناتھ سنگھ کی موجودگی میں کئے جنہوں نے سی آئی آئی کے سالانہ اجلاس میں شرکت کی۔ انہوں نے جمعرات 29 مئی کو دفاعی شعبہ میں خریداری میں ہورہی تاخیر پر شدید ردعمل کا اظہار کرتے ہوئے کہا کہ کئی معاہدوں پر دستخط کیے گئے ہیں یہ جانتے ہوئے کہ پروجیکٹس کی فراہمی نہیں کی جائے گی۔
فضائیہ کے سربراہ امر پریت سنگھ نے کہا کہ "کئی بار معاہدوں پر دستخط ہوتے ہیں، لیکن ہتھیاروں کی ڈیلیور نہیں ہوتی۔ اس میں سب سے بڑا مسئلہ ٹائم لائن ہے۔ میں ایک بھی پروجیکٹ کے بارے میں سوچ نہیں سکتا جو وقت پر مکمل ہوا ہو۔ ایسے وعدے کیوں کریں جب اسے ڈیلیور نہیں کیا جاسکتا؟ تیجس ایم کے 1 میں کافی تاخیر ہوئی ہے اور تیجس ایم کے 2 پروٹوٹائپ بھی دستیاب نہیں کیا گیا ہے۔ ایک بار جب ہم کسی چیز کے لیے عزم کر لیتے ہیں، تو ہمیں اِس کے لیے انتھک محنت کرنی پڑتی ہے۔”
انہوں نے آپریشن سندور کو ایک "قومی فتح” کے طور پر سراہتے ہوئے کہا کہ ہم سچائی کا راستہ اختیار کر رہے تھے، مجھے لگتا ہے کہ اس میں خدا بھی ہمارے ساتھ ہے۔” آئی اے ایف کے سربراہ نے کہاکہ "یہ آپریشن سندور جس کے بارے میں ہم بات کر رہے ہیں، یہ ایک قومی فتح ہے۔ میں ہر ایک بھارتی کا شکریہ ادا کرتا ہوں۔ مجھے یقین ہے کہ ہر ہندوستانی اس جیت کی طرف دیکھ رہا تھا۔”
ایئر مارشل اے پی سنگھ نے مشورہ دیا کہ "ہمیں میدان جنگ میں تیزی سے بدلتی ہوئی ٹیکنالوجیز کے ساتھ چلنا چاہئے، جیسا کہ ہمارے بحریہ کے سربراہ نے کہاکہ ، میدان جنگ تیزی سے تبدیل ہو رہا ہے۔ ہم ہر روز نئی ٹیکنالوجیز آتے دیکھ رہے ہیں۔ آپریشن سندور کے ساتھ ہم کہاں ہیں؟ ہمیں واضح طور پر اندازہ ہو گیا ہے کہ مستقبل کیا ہے، ہمیں بہت کچھ کرنا ہے۔ اے اے ایم سی اے پراجیکٹ کو نجی شعبے کے لیے بھی کلیئر کر دیا گیا ہے۔ یہ ایک بہت بڑا فیصلہ ہے۔ ملک کو اعتماد ہے کہ وہ ہمارے نجی شعبے میں مستقبل میں بڑے پیمانے پر تبدیلیاں لائے گا۔”
اس سال جنوری کے شروع میں، ایئر چیف نے تیجس کی ترسیل پر اپنے شدید عدم اطمینان کا اظہار کیا تھا۔ انہوں نے تبصرہ کیاکہ مینوفیکچررز کو پیداوار کی رفتار بڑھانے اور اپنے انسانی وسائل کی مہارت کو بہتر بنانے کی ضرورت ہے۔
