امت نیوز ڈیسک //
سری نگر، : وسطی کشمیر کے ضلع گاندربل کے تولہ مولہ علاقے میں واقع مشہور ماتا کھیر بھوانی مندر میں سالانہ ‘میلہ کھیر بھوانی’ انتہائی تزک و احتشام اور مذہبی جوش و خروش سے منایا جا رہا ہے۔جموں و کشمیر کے لیفٹیننٹ گورنر منوج سنہا بھی منگل کی صبح کھیر بھوانی مندر پر حاضر ہوئے اور وہاں خصوصی دعاؤں اور پوجا میں شرکت کی۔ادھر میلہ میں شرکت کرنے کے لئے صبح سے ہی حسب معمول ملک کے مختلف حصوں سے آئے ہوئے کشمیری پنڈت عیقدت مندوں کا تانتا بندھا رہا اور وہاں خصوصی دعاؤں اور پوجا میں شریک ہونے لگے۔
نوے کی دہائی میں وادی میں مسلح تحریک شروع ہونے کے بعد بیشتر کشمیری پنڈتوں نے ہندوستان کے مختلف ریاستوں اور شہروں کی طرف ہجرت کی تھی اور چند سو کشمیری پنڈتوں نے ہی وادی میں ٹھہرنے کو ترجیح دی تھی۔ تاہم گذشتہ قریب ایک دہائی سے مہاجر کشمیری پنڈتوں کی میلہ کھیر بھوانی کے تہوار میں شرکت میں غیرمعمولی اضافہ دیکھا جارہا ہے۔ایک پنڈت عیقدت مند نے کہا: ‘اس میلے کی کشش اور عقیدت ہر سال ملک کے مختلف حصوں میں مقیم سینکڑوں پنڈتوں کو کشمیر کھینچ لاتی ہے’۔
تولہ مولہ میں واقع کھیربھوانی کشمیری پنڈتوں کی ایک مقدس جگہ ہے جہاں پر رگنیادیوی جو اِن کی ایک مقدس دیوی ہیں، کی مندر ہیں۔ کشمیری پنڈتوں کے مطابق رگنیا دیوی صرف کشمیر میں پوجی جاتی ہے۔ اس مندر میں کشمیری پنڈت ’میلہ کھیر بھوانی‘ کے نام سے مشہور تہوار ہر سال مناتے ہیں۔ میلہ کھیر بھوانی کو کشمیری پنڈتوں کا سب سے بڑا اور اہم تہوار مانا جاتا ہے۔حکام کا کہنا ہے کہ اس میلے کے احسن انعقاد کو یقینی بنانے کے لئے سیکورٹی اور دیگر تمام انتظامات کئے گئے ہیں۔
سیکرٹری ہیلتھ اینڈ میڈیکل ایجوکیشن ڈاکٹرعابد رشید کا کہنا ہے کہ وسطی کشمیر کے ضلع گاندربل کے تولہ مولہ علاقے میں ماتا کھیر بھوانی میلے کے خوش اسلوبی سے انعقاد کو یقینی بنانے کے لیے تمام ضروری انتظامات کو حتمی شکل دی گئی ہے۔انہوں نے کہا: ‘محکمہ صحت نے کسی بھی طبی صورتحال سے نمٹنے کے لیے یہاں پر مناسب طبی عملہ اور سہولیات کو تعینات کیا ہے، ایمبولینسز، موبائل میڈیکل یونٹس، اور ابتدائی طبی امداد کے مراکز مکمل طور پر لیس اور آپریشنل ہیں’۔
سینئر کانگریس لیڈر اور جموں و کشمیر کے سابق صدر ریاست ڈاکٹر کرن سنگھ نے گذشتہ روز مندر پر حاضری دی اور عقیدت مندوں کو زیادہ سے زیادہ تعداد میں اس میلے میں شرکت کرنے کی اپیل کی۔مورخین کے مطابق کھیر بھوانی کی مندر کو 1912 میں مہاراجہ پرتاب سنگھ نے تعمیر کیا تھا۔ کھیربھوانی کے اس مقدس مندر کے مقام پر ایک چشمہ ہے ، جو پنڈتوں کے مطابق ہر سال اپنا رنگ بدلتا رہتا ہے اور کشمیر کے لئے اگلے سال کیسا ہوگا، کی رنگ کے ذریعے پیشن گوئی کرتا ہے۔
