امت نیوز ڈیسک //
نئی دہلی: وزارت خارجہ نے جمہوریہ مالی کے کییس میں ڈائمنڈ سیمنٹ فیکٹری میں ملازم تین بھارتی شہریوں کے اغوا پر اپنی تشویش کا اظہار کیا۔ یہ واقعہ یکم جولائی کو پیش آیا جب مسلح حملہ آوروں کے ایک گروپ نے فیکٹری کے احاطے پر حملہ کیا اور تین بھارتی شہریوں کو زبردستی یرغمال بنا لیا۔ ایک بیان میں، وزارت نے کہا کہ "حکومت ہند کے علم میں یہ بات آئی ہے کہ یکم جولائی 2025 کو مغربی اور وسطی مالی کے متعدد مقامات پر کئی فوجی اور سرکاری تنصیبات پر دہشت گردوں نے حملہ کیا تھا”۔
بیان میں کہا گیا کہ ’بماکو میں بھارتی سفارت خانہ مالی کی حکومت کے متعلقہ حکام، مقامی قانون نافذ کرنے والی ایجنسیوں کے ساتھ ساتھ ڈائمنڈ سیمنٹ فیکٹری کے انتظام کے ساتھ قریبی اور مستقل رابطے میں ہے۔ مشن مغوی بھارتی شہریوں کے اہل خانہ سے بھی رابطے میں ہے۔ "حکومت ہند تشدد کے اس افسوسناک عمل کی واضح طور پر مذمت کرتی ہے اور جمہوریہ مالی کی حکومت سے مطالبہ کرتی ہے کہ وہ مغوی بھارتی شہریوں کی محفوظ اور جلد رہائی کے لیے تمام ضروری اقدامات کرے۔
بیان میں مزید کہا گیا ہے کہ بیرون ملک بھارتی شہریوں کی حفاظت، تحفظ اور بہبود، حکومت ہند کی اولین ترجیح ہے۔ "وزارت، مالی میں مقیم تمام بھارتی شہریوں کو مشورہ دیتی ہے کہ وہ انتہائی احتیاط برتیں، چوکس رہیں اور باماکو میں بھارتی سفارت خانے کے ساتھ باقاعدہ اپ ڈیٹس اور ضروری مدد کے لیے قریبی رابطے میں رہیں”۔
