امت نیوز ڈیسک //
متحدہ مجلسِ علماء، جو تمام اسلامی مکاتبِ فکر، سنی اور شیعہ، کے علماء اور قائدین پر مشتمل ہے — نے مسلمانوں میں اتحاد اور ذمہ دارانہ طرزِ عمل سے متعلق اپنے پہلے بیان کے بعد، ایک بار پھر سخت تشویش اور شدید مذمت کا اظہار کیا ہے، جو کہ عمران رضا انصاری کی جانب سے دانستہ اور مسلسل اشتعال انگیزیوں پر مبنی ہے۔
ایم ایم یو کی طرف سے کہا گیا کہ پچھلے بیان میں، مجلس نے دانستہ طور پر نام لینے سے گریز کیا تھا، اس امید پر کہ متعلقہ فرد اپنی سنگین غلطی پر غور کرے گا اور اصلاح کی راہ اختیار کرے گا۔ تاہم، اس کے برعکس، عمران انصاری نے اب کھلے عام رسول اکرم ﷺ کے جلیل القدر صحابہ کرامؓ کے خلاف گستاخی اور نازیبا کلمات کا ارتکاب کیا ہے۔ یہ طرزِ عمل انتہائی قابلِ مذمت، ناقابلِ قبول اور اسلامی اتحاد، اخلاقیات اور باہمی احترام کی بنیادوں پر حملہ ہے، جسے ہرگز برداشت نہیں کیا جا سکتا۔
ایم ایم یو نے کہا کہ یہ اختلافِ رائے کا معاملہ نہیں بلکہ ایک سوچی سمجھی سازش ہے جس کا مقصد کشمیری معاشرے میں فرقہ وارانہ فساد کو ہوا دینا ہے — اور یہ عمل اس ہم آہنگی اور اتحاد کے لیے شدید خطرہ ہے جسے نسلوں سے علمائے کرام اور دینی شخصیات نے باہمی احترام، برداشت اور مکالمے کے ذریعے قائم رکھا ہے۔
مجلس نے کہا کہ اہم بات یہ ہے کہ خود شیعہ مکتبِ فکر کے علماء بھی ان اشتعال انگیز بیانات سے سخت رنجیدہ ہیں۔ معروف شیعہ علماء، جن میں آغا سید حسن الموسوی، مولوی مسرور عباس انصاری، آغا سید محمد ہادی الموسوی اور دیگر شامل ہیں، نے واضح طور پر عمران انصاری کے بیانات سے لاتعلقی کا اظہار کیا ہے اور کہا ہے کہ اس قسم کی زبان نہ اسلام کی تعلیمات میں ہے اور نہ ہی اہل بیتؑ کی روایات میں۔
اس سلسلے میں ایم ایم یو نے حکام سے مطالبہ کیا کہ عمران رضا انصاری کے خلاف فوراً قانونی کارروائی کی جائے کیونکہ وہ فرقہ وارانہ نفرت پھیلا رہے ہیں اور مسلمانوں کے مذہبی جذبات کو شدید مجروح کر رہے ہیں۔
بیان میں کہا گیا کہ ، متحدہ مجلسِ علماء کے تمام اراکین — خواہ وہ سنی ہوں یا شیعہ — نے اتفاقِ رائے سے یہ فیصلہ کیا ہے کہ جب تک جناب عمران انصاری اپنے بیانات واپس لے کر عوامی معافی نہیں مانگتے، ان کا مکمل سماجی اور مذہبی بائیکاٹ کیا جائے گا۔ متحدہ مجلس یا اس سے وابستہ کسی بھی تنظیم یا اجتماع میں انہیں مدعو نہیں کیا جائے گا۔
