امت نیوز ڈیسک //
سرینگر، 26 جولائی: جموں و کشمیر حکومت نے تمام سرکاری طبی اداروں میں تعینات ڈاکٹرز اور پیرا میڈیکل اسٹاف کو ہدایت دی ہے کہ وہ ڈیوٹی کے دوران سفید اپرن اور نام کی تختی پہننا لازمی بنائیں۔
یہ ہدایت اس بات کے پیش نظر جاری کی گئی ہے کہ بڑی تعداد میں میڈیکل اسٹاف، بشمول نیشنل ہیلتھ مشن اور آیوش کے تحت تعینات عملہ، ڈیوٹی کے دوران اپرن نہیں پہنتا اور نہ ہی شناخت ظاہر کرنے والی تختی لگاتا ہے، جس سے مریضوں اور تیمارداروں کو عملے کی شناخت میں دشواری کا سامنا کرنا پڑتا ہے۔
سرکاری سرکلر میں کہا گیا ہے کہ: "یہ مشاہدہ کیا گیا ہے کہ مختلف سرکاری طبی اداروں میں ڈاکٹرز اور پیرا میڈیکل اسٹاف اپرن پہننے اور نام کی تختی ڈسپلے کرنے کے ضابطوں پر صحیح طریقے سے عمل نہیں کر رہے، جس سے مریضوں کو طبی عملے کو پہچاننے میں پریشانی ہو رہی ہے۔”
سرکلر کے مطابق، این ایچ ایم اور آیوش کے تحت کام کرنے والے تمام ڈاکٹرز سمیت تمام پیرا میڈیکل اسٹاف کو ہدایت دی گئی ہے کہ وہ ڈیوٹی کے اوقات میں سفید اپرن پہنیں اور اپنے مکمل نام اور عہدے کی واضح تختی لگائیں۔
تمام ادارہ سربراہان، میڈیکل سپرنٹنڈنٹس اور چیف میڈیکل آفیسرز کو ان احکامات پر سختی سے عملدرآمد یقینی بنانے کی ہدایت دی گئی ہے۔
