امت نیوز ڈیسک //
امریکی صدر ڈونالڈ ٹرمپ نے ہفتہ کے روز کہا کہ انہوں نے کمبوڈیا اور تھائی لینڈ کے رہنماؤں سے دونوں ہمسایہ ممالک کے درمیان بڑھتے ہوئے تناؤ کے پیش نظر بات چیت کی۔اسی دوران انہوں نے بھارت اور پاکستان کے درمیان ہونے والے تنازع کا بھی ذکر کیا اور دعویٰ کیا کہ انہوں نے اس تنازع کو کامیابی کے ساتھ اس معاملے کو حل کیا تھا۔ہفتے کے روز سوشل میڈیا پر ایک پوسٹ میں ٹرمپ نے کہا کہ انہوں نے کمبوڈیا کے وزیر اعظم ہُن مانیت سے تھائی لینڈ کے ساتھ جنگ روکنے کے حوالے سے بات کی ہے۔
تھائی لینڈ اور کمبوڈیا کے تنازع کے بیچ امریکہ کی مداخلت سامنے آئی ہے۔ تھائی لینڈ کی وزارت خارجہ کی جانب سے سوشل میڈیا پر جاری کردہ ایک بیان میں کہا گیا کہ جنگ بندی کے حوالے سے تھائی لینڈ کے قائم مقام وزیر اعظم نے امریکی صدر ڈونالڈ ٹرمپ سے گفتگو کی ہے۔
تھائی لینڈ کی وزارت خارجہ نے سوشل میڈیا پلیٹ فارم “ایکس” پر لکھا:“وزارت خارجہ مطلع کرنا چاہتی ہے کہ کچھ لمحے قبل قائم مقام وزیر اعظم فُمتھم ویچایاچائی نے صدر ٹرمپ سے بات چیت کی اور درخواست کی کہ تھائی لینڈ اور کمبوڈیا فوری طور پر جنگ بندی پر رضامند ہوں۔ قائم مقام وزیر اعظم نے صدر ٹرمپ کا ان کی تشویش پر شکریہ ادا کیا اور کہا کہ تھائی لینڈ اصولی طور پر جنگ بندی پر متفق ہے۔”
تھائی لینڈ کا کمبوڈیا پر بالواسطہ حملہ
اس دوران تھائی لینڈ نے کمبوڈیا پر بالواسطہ حملہ بھی کیا۔ تھائی لینڈ نے کہا:”قابل ذکر بات یہ ہے کہ تھائی لینڈ کمبوڈیائی فریق سے خلوص نیت کی توقع رکھتا ہے۔ اس لیے، قائم مقام وزیر اعظم نے صدر ٹرمپ سے درخواست کی کہ وہ کمبوڈیائی قیادت کو مطلع کریں کہ تھائی لینڈ جنگ بندی اور تنازع کے پُرامن حل کے اقدامات و طریقہ کار کو ترتیب دینے کے لیے جلد از جلد دو طرفہ مذاکرات کا خواہاں ہے۔”
ڈونالڈ ٹرمپ نے بات چیت کی تصدیق کی
امریکی صدر ڈونالڈ ٹرمپ نے بھی سوشل میڈیا پلیٹ فارم “ٹروتھ” پر تھائی لینڈ اور کمبوڈیا کے وزرائے اعظم سے اپنی گفتگو کی تصدیق کی ہے۔کمبوڈیا کے وزیر اعظم سے ہونے والی بات چیت کے بارے میں ٹرمپ نے لکھا:”ابھی ابھی کمبوڈیا کے وزیر اعظم سے میری اچھی گفتگو ہوئی، اور میں نے انہیں تھائی لینڈ اور اس کے قائم مقام وزیر اعظم کے ساتھ اپنی گفتگو سے آگاہ کیا۔ دونوں فریق فوری جنگ بندی اور امن چاہتے ہیں۔ وہ امریکہ کے ساتھ ’تجارتی مذاکرات‘ پر بھی واپس آنا چاہتے ہیں، جو میرے خیال میں تب تک مناسب نہیں جب تک جنگ ختم نہ ہو جائے۔ دونوں فریق فوری ملاقات، جنگ بندی اور بالآخر امن پر متفق ہو چکے ہیں۔”
ڈونالڈ ٹرمپ کی تجارتی انتباہ
ٹرمپ نے اس دوران دونوں ممالک کے ساتھ تجارت کے حوالے سے ایک انتباہ بھی جاری کیا۔ انہوں نے کہا:“دونوں ممالک کے ساتھ تجارت کرنا میرے لیے باعثِ اعزاز تھا۔ ان کا ایک طویل اور شاندار تاریخ و ثقافت ہے۔ اُمید ہے کہ وہ آنے والے کئی سالوں تک مل کر کام کریں گے۔ جب سب کچھ مکمل ہو جائے گا اور امن قائم ہو جائے گا، تو میں دونوں ممالک کے ساتھ اپنے تجارتی معاہدوں کو حتمی شکل دینے کے لیے پُرجوش ہوں۔”
اسی طرح تھائی لینڈ کے قائم مقام وزیر اعظم سے بات چیت کا ذکر کرتے ہوئے ٹرمپ نے سوشل میڈیا پر لکھا: “میں نے ابھی ابھی تھائی لینڈ کے قائم مقام وزیر اعظم سے بات کی، اور یہ بہت اچھی گفتگو رہی۔ کمبوڈیا کی طرح تھائی لینڈ بھی فوری جنگ بندی اور امن چاہتا ہے۔ اب میں یہ پیغام کمبوڈیا کے وزیر اعظم کو واپس بھیجوں گا۔ دونوں فریقوں سے بات کرنے کے بعد، جنگ بندی، امن اور خوشحالی ایک فطری نتیجہ معلوم ہوتے ہیں۔ ہم جلد ہی دیکھیں گے۔”
معاملہ کیا ہے؟
گزشتہ کچھ دنوں سے تھائی لینڈ اور کمبوڈیا کے درمیان سرحدی تنازع کے باعث شدید جھڑپیں ہو رہی ہیں۔ دونوں جانب سے افواج تعینات ہیں۔ تھائی لینڈ کی فائرنگ میں کمبوڈیا کے 23 افراد ہلاک ہو چکے ہیں، جبکہ کمبوڈیا کی فائرنگ میں تھائی لینڈ کے 13 افراد جان سے ہاتھ دھو بیٹھے ہیں۔
