امت نیوز ڈیسک //
جموں، 26 اگست: لگاتار بارشوں کے باعث جموں-سرینگر قومی شاہراہ پر مختلف مقامات پر مٹی کے تودے اور پتھروں کے گرنے کے واقعات پیش آئے ہیں جس کی وجہ سے حکام نے ہر قسم کی گاڑیوں کی آمد و رفت معطل کر دی ہے۔ شاہراہ کے کئی حصے غیر محفوظ ہو گئے ہیں، خاص طور پر ضلع رامبن کے علاقے جیسے مہر، کیفےٹیریا موڑ اور پنٹھال سب سے زیادہ متاثر ہیں۔
سرکاری ذرائع نے کشمیر نیوز ٹرسٹ کو بتایا کہ پچھلے 24 گھنٹوں سے جاری شدید بارشوں نے ڈھلوان پہاڑیوں کی مٹی اور چٹانوں کو ڈھیلا کر دیا ہے جس سے ملبہ شاہراہ پر گر رہا ہے اور سفر کو خطرناک بنا رہا ہے۔
ٹریفک پولیس نے عوام سے اپیل کی ہے کہ وہ موسم بہتر ہونے اور سڑک کی صفائی کے کام مکمل ہونے تک شاہراہ پر سفر کرنے سے گریز کریں۔ نیشنل ہائی ویز اتھارٹی آف انڈیا کی ٹیمیں ضلعی انتظامیہ کے ساتھ مل کر ملبہ ہٹانے کے کام میں مصروف ہیں، تاہم شاہراہ کی بحالی کے لیے کوئی باضابطہ ٹائم لائن نہیں دی گئی ہے۔
محکمہ موسمیات کی رپورٹوں کے مطابق آئندہ دو دن تک مزید بارشوں کا امکان ہے، جس سے مزید بھوسکھلن اور مقامی سیلاب کا خطرہ بڑھ گیا ہے۔ حکام نے مقامی لوگوں، ٹرانسپورٹروں اور سیاحوں کو مشورہ دیا ہے کہ وہ الرٹ رہیں اور کسی بھی سفر سے قبل سرکاری ٹریفک ایڈوائزری سے باخبر رہیں۔ شاہراہ کی بندش نے ضروری سامان کی ترسیل پر بھی اثر ڈالا ہے۔ (کے این ٹی)
