امت نیوز ڈیسک //
سرینگر، 13 ستمبر : پیپلز ڈیموکریٹک پارٹی (پی ڈی پی) کے رہنما اور پلوامہ کے ایم ایل اے وحید پرہ نے جمعہ کو جموں و کشمیر اسمبلی کے اسپیکر عبد الرحیم رادھر پر زور دیا کہ وہ ایوان کے محافظ کی حیثیت سے اراکین اسمبلی کا دفاع کریں، کیونکہ ادارے کی ساکھ داو پر لگی ہوئی ہے۔
یہ بیان اس وقت سامنے آیا جب اسپیکر نے اُنہیں ایک سوشیل میڈیا پوسٹ کے حوالے سے شوکاز نوٹس جاری کیا جس میں پارہ نے دعویٰ کیا تھا کہ اسمبلی سیکریٹریٹ نے عام آدمی پارٹی (اے اے پی) کے ایم ایل اے مہراج ملک کی پبلک سیفٹی ایکٹ (پی ایس اے) کے تحت گرفتاری کی توثیق کی ہے۔
پرہ نے کہا: ’’اگر اسپیکر کا دفتر کسی منتخب رکن کا دفاع نہیں کرتا تو یہ ایک خطرناک نظیر قائم کرے گا۔ مسئلہ کسی ایک فرد کا نہیں بلکہ ادارے کا ہے، جو جموں و کشمیر کے شہریوں کی نمائندگی کے لئے آخری جگہ بچی ہے۔‘‘ انہوں نے مزید کہا کہ اسپیکر کو اُن کی تشویش کو غلط قرار دینے کے بجائے اس کی حمایت کرنی چاہیے تھی۔
پرہ، جنہوں نے عبد الرحیم رادھر کو ایک ’’والد کی مانند شخصیت‘‘ قرار دیا، نے کہا کہ اُنہیں ان سے کوئی ذاتی رنجش نہیں ہے۔ ’’اسمبلی اجلاسوں کے دوران میں نے اُن کے اندازِ کار سے بہت کچھ سیکھا کہ کس طرح انہوں نے ایوان چلایا، تنوع کو برقرار رکھا اور مختلف آوازوں کو جگہ دی۔ لیکن بطور محافظ، اراکین کے تحفظ کے لئے اقدامات بھی اتنے ہی ضروری ہیں،‘‘ انہوں نے کہا۔(کے این ٹی)
