امت نیوز ڈیسک //
سرینگر، 29 اکتوبر : سی پی آئی (ایم) کے رہنما اور ایم ایل اے محمد یوسف تاریگامی نے بدھ کے روز جموں و کشمیر حکومت سے مطالبہ کیا کہ وہ فوری طور پر ان کشمیری نظر بندوں کو، جو ریاست سے باہر مختلف جیلوں میں قید ہیں، بشمول سینئر حریت رہنما شبیر احمد شاہ، واپس جموں و کشمیر کی جیلوں میں منتقل کرنے کے لیے اقدامات کرے۔
اسمبلی اجلاس کے دوران مسئلہ اٹھاتے ہوئے تاریگامی نے بتایا کہ انہیں شبیر شاہ کے اہلِ خانہ کی ایک ہنگامی کال موصول ہوئی، جس میں اُنہوں نے شاہ کی بگڑتی ہوئی صحت پر گہری تشویش ظاہر کی۔
انہوں نے کہا، "مجھے شبیر شاہ کے اہلِ خانہ کا فون آیا، وہ انتہائی پریشان ہیں اور کہہ رہے ہیں کہ اُن کی حالت تشویشناک ہے۔ ایسے کئی اور لوگ بھی ہیں۔ میں حکومت سے درخواست کرتا ہوں کہ وہ پہل کرے اور اُنہیں واپس جموں و کشمیر کی جیلوں میں رکھنے کے لیے اقدامات کرے۔”
تاریگامی نے کہا کہ طویل مدت تک کشمیری قیدیوں کو اُن کے اہلِ خانہ سے دور رکھنے سے شدید جذباتی اور انسانی نقصان ہو رہا ہے۔
انہوں نے حکومت پر زور دیا کہ وہ وزارتِ داخلہ ہند سے رجوع کرے اور تمام ایسے قیدیوں کی منتقلی کو یقینی بنائے تاکہ اُنہیں اپنے گھروں اور اہلِ خانہ کے قریب رکھا جا سکے۔
سی پی آئی (ایم) رہنما نے اُن قیدیوں کی صحت کے حوالے سے بھی تشویش ظاہر کی جو دائمی امراض میں مبتلا ہیں، اور حکومت سے مطالبہ کیا کہ اُن کی باقاعدہ طبی جانچ، انسانی بنیادوں پر بہتر علاج، اور جیل قوانین پر سختی سے عمل درآمد یقینی بنایا جائے۔ (کے این ٹی)
