امت نیوز ڈیسک //
وزیر اعلیٰ عمر عبداللہ نے منگل کے روز نواگام پولیس اسٹیشن میں حالیہ حادثاتی دھماکے میں جاں بحق ہونے والے افراد کے اہلِ خانہ سے ملاقات کی۔
انہوں نے مرحوم اعجاز افضل میر کے اہلِ خانہ سے ایچ ایم ٹی زینہ کوٹ میں، مرحوم محمد امین میر کے گھر بمنہ میں، مرحوم شوکت احمد بٹ کے گھر قمرواری میں، مرحوم سہیل احمد راتھر کے گھر نٹی پورہ میں، اور مرحوم محمد شفیع پرے کے گھر وانبل میں جاکر تعزیت پیش کی۔
وزیر اعلیٰ نے اس ناقابلِ تلافی نقصان پر گہرے دکھ اور رنج کا اظہار کیا اور دعا کی کہ اللہ تعالیٰ مرحومین کو جنت الفردوس میں اعلیٰ مقام عطا فرمائے۔ انہوں نے اہلِ خانہ کے لیے صبر و استقامت کی بھی دعا کی۔
گہرے رنج کا اظہار کرتے ہوئے وزیر اعلیٰ نے کہا:
"یہ المناک واقعہ اُن محنتی اور بہادر افراد کو ہم سے لے گیا جو خلوص اور ذمہ داری کے ساتھ عوام کی خدمت کر رہے تھے۔ ان کا نقصان پورے جموں و کشمیر کا نقصان ہے۔”
انہوں نے یقین دلایا کہ حکومت اس مشکل گھڑی میں سوگوار خاندانوں کے ساتھ مضبوطی سے کھڑی ہے اور کہا:”ہم اس غم کی گھڑی میں ہر ممکن مدد یقینی بنائیں گے۔”
وزیر اعلیٰ نے اہلِ خانہ کو وزیر اعلیٰ ریلیف فنڈ سے امداد فراہم کرنے کی بھی یقین دہانی کرائی۔
بعد ازاں، وزیر اعلیٰ نے نوگام کے Ujala Cygnus اسپتال کا دورہ کیا اور زخمی افراد کی عیادت کی۔ انہوں نے ان کی طبی حالت کا جائزہ لیا اور ڈاکٹروں و تیمارداروں سے بات چیت کی۔ بہترین ممکنہ علاج کی ہدایت دیتے ہوئے انہوں نے کہا:”ہر زخمی کو بہترین طبی سہولیات فراہم کی جائیں۔ ان کی صحت ہماری اولین ترجیح ہے۔”
وزیر اعلیٰ کے ہمراہ اُن کے مشیر ناصر اسلم وانی، ایم ایل اے چھانپورہ مشتاق احمد گرو اور دیگر متعلقہ افسران بھی موجود تھے۔
