امت نیوز ڈیسک //
جموں، 2 مئی: جموں کے بنتلاب کے تھاٹھر علاقے میں زیرِ تعمیر پل (کلورٹ) کا ایک حصہ اچانک گرنے سے تین مزدور جاں بحق جبکہ ایک کو زندہ بچا لیا گیا۔
حکام کے مطابق، حادثے کے وقت چار مزدور پل کے نیچے کام کر رہے تھے کہ ڈھانچے کا ایک حصہ منہدم ہو گیا اور وہ ملبے تلے دب گئے۔
واقعے کے فوراً بعد پولیس، فوج، این ڈی آر ایف، ایس ڈی آر ایف اور سول انتظامیہ کی ٹیمیں موقع پر پہنچ گئیں اور مشترکہ طور پر ریسکیو آپریشن شروع کیا گیا۔ ملبہ ہٹانے کے لیے جے سی بی اور دیگر مشینری کا استعمال کیا گیا۔
حکام نے بتایا کہ ایک زخمی مزدور کو زندہ نکال کر اسپتال منتقل کیا گیا، جہاں اس کی حالت مستحکم بتائی جا رہی ہے، جبکہ دیگر تین مزدوروں کی لاشیں رات بھر جاری آپریشن کے دوران نکالی گئیں۔
ایڈیشنل ڈسٹرکٹ ڈیولپمنٹ کمشنر جموں، ٹھاکر شیر سنگھ کے مطابق ریسکیو آپریشن رات تقریباً ایک بجے مکمل ہوا۔ —(کے این او)
