امریکا میں بھی کرونا فنڈ میں اربوں ڈالر کا فراڈ

(واشنگٹن) امریکی وفاقی ادارے سیکرٹ سروس نے انکشاف کیا ہے کہ کورونا وائرس سے متاثرہ کاروبار اور شہریوں کی مدد کے لیے قائم شدہ فنڈ میں سے 100 ارب ڈالر چرا لیے گئے ہیں۔ امریکی ادارے کے عہدے دار روئے ڈوسٹن نے ایک انٹرویو میں بتایا ہے کہ سیکرٹ سروس نے وزارت لیبر اور چھوٹے کاروباروں کے ذمے دار ادارے کی جانب سے فراہم کردہ معلومات پر اس فراڈ کا اندازہ لگایا ہے۔ ان کا مزید کہنا تھا کہ اس میں وزارت انصاف کی جانب سے نمٹائے جانے والے فراڈ کے کیسوں کو شامل نہیں کیا گیا۔ڈوسٹن کا کہنا تھا کہ یہ چوری شدہ رقم کل امدادی فنڈ کا 3 فیصد بنتا ہے، تاہم اس سے ہمیں معلوم ہوتا ہے کہ کرپشن اور چوری کے عادی افراد کے لیے یہ فنڈ کتنا دلکش ہے۔ سیکرٹ سروس کے مطابق اس سب سے بڑا حصہ بیروزگاری کے فراڈ کا ہے۔ امریکی وزارت لیبر نے بتایا کہ بے روزگار افراد کے لیے قائم فنڈ سے 87 ارب ڈالر کی خطیر رقم جعل سازوں کو ادا کی گئی ہے۔ امریکی سیکرٹ سروس نے بیروزگاری انشورنس اور قرضوں میں فراڈ کے کیسوں کا تعاقب کرتے ہوئے 2.3ارب ڈالر برآمد کر لیے ہیں۔کرونا فنڈ میں غبن کے شبہے میں 900 ملزمان کے خلاف تحقیقات جاری ہے اور اس سلسلے میں 100 افراد کو حراست میں لے لیا گیا ہے۔