(مکہ المکرمہ) حرمین انتظامیہ کا کہنا ہے کہ نمازیوں اور زائرین میں سماجی فاصلے پر آج سے عمل شروع کردیا جائے گا۔ حرمین انتظامیہ نے مزید کہا کہ مطاف میں سماجی فاصلے کو برقرار رکھنے کے لیے پہلے کی طرح راستے بنائے جارہے ہیں۔ مطاف میں زمین پر نشانات کے اسٹیکر چسپاں کرنے کا عمل شرع ہوچکا ہے۔ حرمین انتظامیہ کے مطابق زائرین کو ماسک کی پابندی اور سماجی فاصلے کو یقینی بنانا ہوگا ۔دوسری جانب سعودی عرب کے مختلف شہروں میں کورونا کی وبا کے حوالے سے حفاظتی اقدامات کو دوبارہ سے لازم کر دیا گیا ہے، جن میں چہرے پر ماسک لگانا سرفہرست ہے۔ یہ اقدام ایسے وقت سامنے آیا ہے کہ جب دنیا بھر میں کورونا کی نئی قسم اومیکرون سے متاثر افراد کی تعداد میں اضافہ دیکھا جا رہا ہے۔ بدھ کے روز سعودی وزارت داخلہ کا کہنا تھا کہ ملک بھر میں تمام مقامات پر سرگرمیوں اور تقریبات میں ماسک لگانے اور سماجی فاصلہ رکھنے کی پابندی دوبارہ سے عائد کر دی گئی ہے۔ سعودی سرکاری خبر رساں ایجنسی ایس پی اے کے مطابق یہ فیصلہ جمعرات سے نافذ العمل ہو گا۔ ملک بھر میں کورونا کے تصدیق شدہ کیسوں میں اضافہ ہو رہا ہے۔ وزارت صحت نے منگل کے روز اپنے بیان میں بتایا تھا کہ 24گھنٹوں کے دوران کورونا وائرس کے نئے کیسوں اور ایک ہلاکت کا اندراج ہوا ، جب کہ 147 افراد اس وبا سے صحت یاب ہوئے۔ یاد رہے کہ سعودی وزارت تجارت نے دسمبر کے آغاز میں اعلان کیا تھا کہ کرونا وائرس کی بوسٹر خوراک یکم فروری 2022ء سے بازاروں اور تجارتی مراکز و تنصیبات میں داخلے کے لیے لازمی شرط ہو گی۔ وزارت داخلہ نے اکتوبر میں طبی حوالے سے احتیاطی اقدامات اور حفاظتی تدابیر میں نرمی کا اعلان کیا تھا۔
