(سرینگر) انجمن اوقاف جامع مسجد سرینگر اور میرواعظ فاﺅنڈیشن کے باہمی اشتراک سے مرتب کردہ اسلامی تقویم اور میقات الصلوٰة و الصوم سے آراستہ سال2022-23 کا کلینڈر آج باقاعدہ انجمن کے صدر دفتر پر جاری کردیا گیا۔ انجمن اوقاف کی جانب سے ایک پریس بیان کے مطابق قدیم روایت کے مطابق کلینڈر جا مع مسجد کے اجتماع میں سربراہ انجمن جناب میرواعظ ڈاکٹر مولوی محمد عمر فاروق صاحب بذات خود اجرا کرتے تھے تاہم جامع مسجد کے بند ہونے اور میرواعظ کی مسلسل نظر بندی کے سبب گزشتہ دو برسوں کی طرح امسال بھی یہ ممکن نہیں ہوسکا۔ بیان میں مزید کہا گہا ہے کہ امسال کے کلینڈر میں نادانستہ طور پر پروف ریڈنگ میں کوتاہی کے سبب خلیفہ چہارم سیدنا حضرت علی ؓ کی تاریخ شہادت سمیت کچھ اہم تقاریب اور تاریخوںکا اندراج رہ گیا ہے جس کیلئے ادارہ معذرت خواہ ہے تاہم مذکورہ کلینڈر کا اصلاح شدہ کا اجرا بھی عمل میں لایا گیا ہے۔
