(سرینگر) سرینگر کے گنجان آبادی والے بٹہ مالو علاقے میں دوران شب آگ کی ایک بھیانک واردات میں کم سے کم سات رہائشی مکان خاکستر ہوگئے۔ تفصیلات کے مطابق بٹہ مالو کی شیخ حمزہ کالونی میں اتوار کی شب شبیر احمد شیخ کے رہائشی مکان سے آگ نمودار ہوئی۔ عینی شاہدین کے مطابق آگ کے شعلوں نے آناً فاناً متصل مکانوں کو بھی اپنی لپیٹ میں لے لیا۔ ان کا کہنا تھا کہ فائر ٹنڈرس اطلاع موصول ہوتے ہی جائے واردات پر پہنچ گئے اور پولیس اور مقامی لوگوں کے ساتھ آگ کو قابو کرنے کی کوششوں میں جٹ گئے لیکن کم سے کم سات مکانوں کو خاکستر ہونے سے نہیں بچا سکے۔ اطلاعات کے مطابق اس دوران محکمہ فائر اینڈ ایمرجنسی سروسز کا ایک اہلکار زخمی بھی ہوگیا ہے۔ آگ لگنے کی وجوہات معلوم کی جا رہی ہیں۔ دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔
