(کپواڑہ) فوج کی پندرہویں کور کے جنرل آفیسر کمانڈنگ لیفٹیننٹ جنرل ڈی پی پانڈے نے کہا ہے کہ ضلع کپواڑہ میں گذشتہ کئی برسوں سے امن کا ماحول چھایا ہوا ہے جو کبھی ملی ٹنسی کا گڑھ مانا جاتا تھا۔ انہوں نے کہا کہ پوری وادی میں امن قائم ہے اور سیکورٹی گرڈ کسی بھی صورتحال کا مقابلہ کرنے کے لئے تیار ہے۔ ان کا کہنا تھا کہ چھٹی پر آنے والے فوجی جوانوں کی ہلاکتوں کو روکنا لوگوں کی اجتماعی ذمہ داری ہے۔ موصوف فوجی آفیسر نے ان باتوں کا اظہار پیر کو کپواڑہ کے کنن ترہگام علاقے میں ایک تقریب کے حاشئیے پر نامہ نگاروں کے سوالوں کے جواب دینے کے دوران کیا۔ ان کا کہنا تھا کہ پوری وادی میں امن قائم ہے اور سیکورٹی گرڈ کسی بھی صورتحال سے نمٹنے کے لئے تیار ہے اور جس علاقے میں جنگجوؤں کے چھپنے کے متعلق اطلاع ملتی ہے وہاں آپریشن کیا جاتا ہے۔ انہوں نے کہا کہ چھٹی پر گھر آنے والے فوجی اہلکاروں کی ہلاکتوں کو روکنا لوگوں کی اجتماعی ذمہ داری ہے۔ ساتھ ہی لوگوں کی ذمہ داری ہے کہ وہ بچوں کو جنگجوؤں کی صفوں میں شمولیت اختیار کرنے سے روکیں۔ ان کا کہنا تھا کہ کمسن بچوں جن کی عمر سولہ سترہ برس کی ہوتی ہے کو بندوق اٹھانے کے لئے تیار کیا جاتا ہے۔
