(نئی دہلی) ریاست کیرالا کے کنُور سے دو مرتبہ سال 1999 سال 2009 تک ممبر آف پارلیمنٹ رہے اے پی عبداللہ کٹی کو حج کمیٹی آف انڈیا کا چیئرمین منتخب کیا گیا ہے۔ ان کے ساتھ ہی حج کمیٹی آف انڈیا میں دو وائس چیئرمین کے لیے منوری بیگم اور محفوظا خاتون کو منتخب کیا گیا۔ واضح رہے کہ سال 2019 میں حج کمیٹی آف انڈیا کی تشکیل نو کی جانی تھی، لیکن دو مرتبہ چھے چھے مہینے کے لیے مدت کار میں توسیع کی گئی اور جون 2020 سے یہ عہدہ خالی تھا۔ کچھ روز قبل ہی راجیہ سبھا ایم پی ظفر الاسلام، شعیہ زمرے سے زین الدین محسن بھائی، اعجاز حسین راتھر، منوری بیگم، ہدایت خان دھولیہ، محفوظا خاتون اور اے پی عبداللہ کٹی کو ممبر نامزد کیا گیا تھا۔ جہاں آج حج کمیٹی کے چیئرمین اور وائس چیئرمین منتخب کیے گئے ہیں۔ انتخابی کارروائی آج دارالحکومت دہلی کے سی جی او کمپلیکس میں صبح دس بجے سے ہی جاری تھا اور تقریباً 12 بجے انتخاب کا اعلان کیا گیا۔
