(سرینگر) جموں و کشمیر میں ” ٹارگیٹ ہلاکتیں “ اور 30جون سے شروع ہونی والی سالانہ امرناتھ یاترا کیلئے سیکورٹی صورتحال کا جائزہ لینے کیلئے وزیر داخلہ امیت شاہ کی سربراہی میں آج یعنی 17مئی کو نئی دلی میں ایک اعلیٰ سطحی جائزہ میٹنگ منعقد ہوگی۔ میٹنگ میں جموں و کشمیر کی سیکورٹی صورتحال کے ساتھ ساتھ امرناتھ یاترا کے سلسلے میںکئے گئے حفاظتی انتظامات کا جائزہ لیا جائے گا ۔ وادی کشمیر میں گزشتہ کئی دنوں سے جاری پولیس و عام شہری ہلاکتوں اور اگلے ماہ سے شروع ہونے والا امرناتھ یاترا کے سلسلے میں سیکورٹی انتظامات کا جائزہ لیا جائے گا۔ میٹنگ میں مرکزی داخلہ سیکرٹری اجے کمار بھلا اور تمام سنٹرل آرمڈ پولیس فورسز اور مرکزی انٹیلی جنس ایجنسیوں کے سربراہان کے علاوہ وزرات داخلہ کے دیگر سینئر افسران ممبران کے علاوہ جموں کشمیر کے لیفٹنٹ گورنر منوج سنہا، چیف سکرٹری ڈاکٹر ارون کمار مہتا، ایڈیشنل چیف سیکرٹری برائے داخلہ آر کے گوئل، ڈائریکٹر جنرل آف پولیس جموں و کشمیر دلباغ سنگھ اور اسپیشل ڈی جی سی آئی ڈی رشمی رنجن سوین بھی شامل ہونگے ۔ ذرائع کے مطابق میٹنگ منگل کو دلی کے نارتھ بلاک میں صبح 11 بجے مقرر ہے اور اس میٹنگ کی صدارت امیت شاہ کریں گے ۔ اس سلسلے میں لیفٹنٹ گورنر سیکورٹی جائزہ میٹنگ اور دیگر اہم کاموں میں شرکت کیلئے سرینگر سے نئی دہلی روانہ ہوئے۔ادھر اعلیٰ سطحی سیکورٹی جائزہ سے پہلے سینٹرل ریزرو پولیس فورس کے ڈائریکٹر جنرل کلدیپ سنگھ آج جموں پہنچے اور نیم فوجی دستوں کے اعلیٰ عہدیداروں کے ساتھ بھگوتی نگر علاقے میں یاتری نواس میں شری امرناتھ یاترا کیلئے سیکورٹی انتظامات کا جائزہ لیا۔سیکورٹی جائزہ میٹنگ کے بعد، ڈی جی سی آر پی ایف امرناتھ جی یاترا کے انتظامات کے اسی طرح کے جائزے کے لیے کشمیر روانہ ہوئے۔ وہ منگل کی صبح امیت شاہ کی طرف سے بلائی گئی میٹنگ میں شامل ہونے کیلئے کل دلی واپس لوٹیں گے ۔ذرائع نے بتایا کہ شاہ جموں و کشمیر میں حالیہ ٹارگٹ کلنگ اور شری امرناتھ جی کی آئندہ یاترا کے انتظامات کے تناظر میں سیکورٹی کے تمام پہلوؤں کا جائزہ لیں گے۔30 جون سے شروع ہونے والی اور 11 اگست تک جاری رہنے والی شری امرناتھ یاترا کے دوران ٹارگٹ کلنگ کو روکنے اور کسی بھی قسم کی تخریبی سرگرمیوں کو روکنے کے لیے کچھ فیصلے لیے جا سکتے ہیں۔ذرائع نے بتایا کہ یاترا سے پہلے عسکریت پسندی کے خلاف کارروائیوں کو مزید تیز کیا جا سکتا ہے ۔
