امت نیوز ڈیسک // جموں وکشمیر کےکوکرناگ کے دنویٹھ پورہ ہانگل گنڈ نامی علاقے میں فوج اور عسکریت پسندوں کے درمیان جو تصادم آرائی شروع ہوئی تھی، بالآخر رات دیر گئے 2 عسکریت پسندوں کے جاں بحق ہونے کے بعد ختم ہوئی۔
تفصیلات کے مطابق جنوبی ضلع اننت ناگ کے حلقہ انتخاب کوکرناگ کے دنویٹھ پورہ ہانگل گنڈ علاقے میں فوج کو عسکریت پسندوں کے چھپے ہونے کی ایک مخصوص اطلاع موصول ہوئی تھی، جس کے بعد فوج، پولیس، اور سی آر پی ایف نے مذکورہ علاقے کو محاصرے میں لے لیا اور گھر گھر تلاشی کاروائی شروع کی، جونہی سیکورٹی فورسز مشتبہ مقام کی جانب پہنچی تو چھپے ہوئے عسکریت پسندوں نے سیکیورٹی فورسز پر اندھا دھند فائرنگ کی، جس کے بعد دونوں اطراف سے گولیوں کا تبادلہ شروع ہوا تھا۔پولیس نے سماجی رابطہ سائٹ ٹویٹر پر اس بات کا اعتراف کیا ہے کہ تصادم آرائی میں حزب المجاہدین کے دو عسکریت پسند ہلاک ہوئے ہیں، جن کی شناخت جنید اور باسط ساکن دنویٹھ پورہ اور ہانگل گنڈ کے بطور ہوئی ہے۔ جھڑپ کی جگہ سے ایک اے کے 47 اور ایک پسٹل برآمد ہوا ہے۔ پولیس نےکہا کہ باسط نامی عسکریت پسند گزشتہ سال سرپنچ غلام رسول ڈار اور اُن کی اہلیہ کے ہلاکت میں ملوث تھا۔
