امت نیوز ڈیسک /// جنوبی کشمیر کے ضلع اننت ناگ کے چھترگل علاقے میں منگل کی صبح اس وقت قیامت صغریٰ برپا ہوئی جب بیٹے کی سڑک حادثے میں موت واقع ہونے کی خبر سن کر باپ حرکت قلب بند ہونے سے داعی اجل کو لبیک کہہ گئے۔
سرکاری ذرائع نے بتایا کہ اننت ناگ کے پنچتھان شانگس علاقے میں منگل کی صبح عارف احمد ولد عبدالرحمان نامی موٹر سائیکل سوار کی ایک مسافر بردار گاڑی سے ٹکر ہوگئی جس کے نتیجے میں وہ شدید زخمی ہوگئے۔
انہوں نے کہا کہ عارف احمد کو علاج و معالجے کے لئے فوری طور سب ضلع ہسپتال شانگس پہنچایا گیا لیکن وہاں ڈاکٹروں نے اس کو مردہ قرار دیا۔
اطلاعات کے مطابق متوفی موٹر سائیکل سوار کے والد عبدالرحمان وانی ولد محمد رمضان وانی نے جب یہ خبر سنی انہیں دل کا دورہ پڑا ۔ جس کے بعد انہیں پڑوسی شانگس اسپتال لے گئے ۔ لیکن وہاں پہنچتے ہی ڈاکٹروں نے انہیں مردہ قرار دیا۔
دونوں کی لاشیں اس وقت ایس ڈی ایچ شانگس میں ہیں۔ اس دلدوز خبر کے بعد علاقے میں سراسیمگی پھیل گئی ہے۔
