جموں//سابق ڈپٹی سپیکر غلام حیدر ملک سمیت تین دیگر کانگریس لیڈران نے پیر کو غلام نبی آزاد کی حمایت میں پارٹی سے استعفیٰ دینے کا اعلان کیا ہے۔
یاد رہے کہ جموں و کشمیر کے سابق وزیر اعلیٰ غلام نبی آزاد نے جمعہ کے روز کانگریس کے ساتھ اپنی پانچ دہائیوں کی رفاقت کو ختم کر تے ہوئے پارٹی کی بنیادی رکنیت سے استعفیٰ دے دیا تھا جس کے یکے بعد دیگر درجنوں سینئر کانگریس لیڈران نے پارٹی سے استعفیٰ دے دیا ہے۔
وہیں آج کٹھوعہ کے بنی اسمبلی حلقہ کے سابق ایم ایل اے غلام حیدر ملک،2سابق ایم ایل سی – کٹھوعہ سے سبھاش گپتا اور ڈوڈہ سے شام لال بھگت – نے علیحدہ طور پر پارٹی ہائی کمان کو اپنا استعفیٰ بھیج دیاہے۔
آزاد کے قریبی ساتھی اور سابق وزیر غلام محمد سروڑی نے کہا، ’’ہمیں غلام حیدر ملک، گپتا اور بھگت کے خطوط (حمایت) موصول ہوئے ہیں۔
ذرائع نے بتایا کہ سابق نائب وزیر اعلیٰ تارا چند، سابق وزراء عبدالمجید وانی، منوہل لال شرما اور گھرو رام اور سابق ایم ایل اے بلوان سنگھ نے بھی آزاد سے دہلی میں ملاقات کی اور امکان ہے کہ وہ منگل کو کانگریس سے استعفیٰ دینے کے بعد آزاد کی حمایت کا اعلان کریں گے۔
کانگریس کے ایک درجن سے زیادہ سرکردہ لیڈران، بشمول سابق وزراء اور قانون ساز، کے علاوہ سینکڑوں پنچایتی راج انسٹی ٹیوشن (پی آر آئی) کے اراکین، میونسپل کارپوریٹرس اور ضلع اور بلاک سطح کے لیڈر آزاد کے ساتھ شامل ہونے کے لیے پہلے ہی کانگریس چھوڑ چکے ہیں، جو جلد ہی جموں وکشمیر سے جلد ہی ایک قومی سطح کی پارٹی کا آغاز کریں گے۔
