سرینگر//مرکزی کابینہ نے PM گتی شکتی فریم ورک کے نفاذ کے لیے طویل مدت کے لیے ریلوے کی زمین پٹے پر دیئے جانے کی پالیسی کو منظوری دی ہے۔ کل نئی دلی میں میڈیا کو جانکاری دیتے ہوئے ۔ اطلاعات و نشریات کے وزیر انوراگ ٹھاکر نے کہا کہ اس پالیسی سے ریلوے کو مزید مالیہ حاصل ہوگا اور تقریباً ایک لاکھ 20 ہزار روزگار پیدا ہوں گے۔ انہوں نے کہا کہ اگلے پانچ سالوں میں تین سو پی ایم گتی شکتی کارگو ٹرمنل تیار کیے جائیں گے۔ صحافیوں سے گفتگو کرتے ہوئے وزیرتعلیم دھرمیندر پردھان نے کہاکہ کابینہ نے ابھرتے ہوئے بھارت کے لیے پرائم منسٹر اسکولس – پی ایم شری اسکولس قائم کرنے کیلئے ایک مرکزی امدادیافتہ نئی اسکیم شروع کرنے کی بھی منظوری دی ہے۔ کابینہ نے کوچی میٹرو ریل کے دوسرے مرحلے کے نفاذ کی بھی منظوری دی ہے جو کہ کاکہ نند کے راستے ہوتے ہوئے جواہر لعل نہرو اسٹیڈیم سے Infopark پر مشتمل ہے۔ گیارہ کلومیٹر سے زیادہ طویل میٹرو روٹ پر گیارہ اسٹیشن ہوں گے اور اس کی تعمیر پر ایک ہزار 957 کروڑ روپے سے زیادہ خرچ ہوں گے۔
