امت نیوز ڈیسک //
کرناٹک میں بھارت جوڑو یاترا کے دوران کانگریس صدر سونیا گاندھی کے جوتے کا تسمہ باندھتے ہوئے راہول گاندھی کی تصویر اور ویڈیو سوشل میڈیا پر خوب پھیل رہا ہے۔
سونیا گاندھی آج اس یاترا میں شامل ہوئیں۔ اس یاتراکی قیادت راہول گاندھی کررہے ہیں۔ مانڈیا ضلع کے بیلور کراس کے قریب جب سونیا گاندھی پدایاترا میں حصہ لینے کے لئے اپنی گاڑی سے اتریں تو راہول گاندھی نے دیکھا کہ سونیا گاندھی کے جوتوں کے تسمے ٹھیک سے نہیں بندھے تھے۔ یہ دیکھتے ہی وہ اپنی ماں سے اس بارے میں کہنے کے بجائے خود انہیں باندھنے کے لئے آگے بڑھے۔
کرناٹک کانگریس یونٹ نے اس تصویر اور ویڈیو کو سوشل میڈیا پر اپ لوڈ کردیا۔ کانگریس نے کہا کہ جو لوگ اپنی ماؤں کی عزت کرتے ہیں اور ان کی دیکھ بھال کرتے ہیں وہ مادر وطن کی بھی عزت کریں گے۔
کانگریس پارٹی کے سوشل میڈیا پوسٹ میں دعویٰ کیا گیا ہے کہ سونیا گاندھی کے ہر قدم میں مضبوطی ہے، یقین ہے، صبر ہے، عزم ہے، وضاحت ہے، قربانی ہے، پیار ہے، ہمدردی ہے، ماں کی مٹھاس ہے، ملک کے لئے لامحدود محبت ہے اور توہین برداشت کرنے کی صلاحیت ہے۔
خرابی صحت کی وجہ سے سونیا گاندھی اس پدا یاترا میں زیادہ دیر شرکت نہیں کرسکیں۔ وہ بعد میں نئی دہلی کے لئے روانہ ہو جائیں گی۔
اس سے پہلے راہول گاندھی نے کیرالہ کے الاپولا ضلع میں ایک چھوٹی بچی کو اس کے جوتے صحیح طریقے سے پہننے میں مدد کی تھی۔ یہ تصویر سوشل میڈیا پر وائرل ہوئی اور ان کی عاجزی و انکساری کو سراہا گیا۔
بھارت جوڑو یاترا کے دوران چھوٹی بچی کو صحیح طریقے سے چلنے میں دشواری ہو رہی تھی، راہول گاندھی نے اسے دیکھا اور اس کی مدد کے لئے آگے بڑھے۔
کرناٹک میں شدید بارش کے درمیان راہول گاندھی کی تقریر کی تصویر بھی سوشل میڈیا پر وائرل ہوئی تھی۔
