امت نیوز ڈیسک //
جموں کے سدھرا علاقے میں چار ملی ٹینٹوں کی ہلاکت کے بعد صوبے بھر میں ہائی الرٹ جاری کیا گیا ہے۔
معلوم ہوا ہے کہ جموں وکشمیر میں پاکستان کے ساتھ لگنے والی بین الاقوامی سرحد اور لائن آف کنٹرول پر فوج اور بی ایس ایف کو مستعد رہنے کے احکامات صادر کئے گئے۔
اطلاعات کے مطابق سدھرا جموں میں بدھ کی صبح چار ملی ٹینٹوں کی ہلاکت کے بعد صوبے میں ہائی الرٹ جاری کیا گیا ۔
ذرائع نے بتایا کہ جموں میں جگہ جگہ سیکورٹی فورسز کی تعیناتی عمل میں لائی گئی جہاں پر ہر آنے جانے والے کی باریک بینی سے تلاشی لی جارہی ہیں۔
ذرائع نے مزید کہاکہ جموں کے دوسرے اضلاع میں راہگیروں کی جامہ تلاشیوں اور گاڑیوں کی چیکنگ کا عمل تیز کیا گیا ۔
کسی بھی ناگہانی واقعہ سے نمٹنے کے لئے ضلع جموں اور اس کے گردونواح میں پولیس اور نیم فوجی دستوں کی بھاری نفری کو تعینات کیا گیا ہے جبکہ تمام اونچی عمارتوں پر ماہر نشانہ بازوں کو تعینات کیا گیا ہے۔
جموں صوبے کے اطراف واکناف بالخصوص مختلف اضلاع کو سرمائی دارالحکومت کے ساتھ جوڑنے والی سڑکوں پر سیکورٹی فورسز اور ریاستی پولیس کے خصوصی ناکے بٹھائے گئے ہیں جہاں چھوٹی بڑی گاڑیوں کو روک کر ان کی تلاشی لی جاتی ہے اور ان میں سوار مسافروں کی جامہ تلاشی لینے کے علاوہ شناختی کارڈ چیک کئے جاتے ہیں۔
جہاں دراندازی کی کسی بھی کوشش کو ناکام بنانے کے لئے ایل او سی اور بین الاقوامی سرحد پر تعینات فوجیوں کو الرٹ حالت میں رکھا گیا ہے، وہیں میدانی علاقوں میں جنگجووں کی سرگرمیوں پر بریک لگانے کے لئے تلاشیوں اور گشت کا سلسلہ تیز کیا گیا ہے۔
دریںا ثنا سدھرا جمو ں تصادم کے دوران راہ فرار اختیار کرنے والے ڈرائیور کی بڑے پیمانے پر تلاش جاری ہے۔
ذرائع نے بتایا کہ جموں کے سبھی پولیس اسٹیشنوں میں تعینات عملے کو ہائی الرٹ پر رہنے کے احکامات جاری کئے گئے۔
ذرائع کے مطابق سری نگر کی طرف جانے والی سبھی شاہراﺅں پر خصوصی ناکے بٹھائے گئے ہیں اور کسی بھی گاڑی کو بغیر تلاشی آگے جانے کی اجازت نہیں دی جارہی ہیں۔
معلوم ہوا ہے کہ ٹنل کے دونوں جانب سیکورٹی فورسز نے جگہ جگہ پر ناکے بٹھائے ہیں اور جوبھی گاڑی جموں سے سری نگر آرہی ہیں اُس میں بیٹھے مسافروں سے پوچھ تاچھ کے بعد ہی اُنہیں آگے جانے کی اجازت دی جارہی ہیں۔
ذرائع کا کہنا ہے کہ مفرور ڈرائیور کو تلاش کرنے اور اُس کی شناخت کے لئے سی سی ٹی وی فوٹیج کو بھی کھنگالا جارہا ہے۔
