امت نیوز ڈیسک //
راجوری: راجوری کے نوشہرہ علاقہ میں گذشتہ روز دیر رات مشکوک افراد کو دیکھا گیا۔ تفصیلات کے مطابق ضلع راجوری کے نوشہرہ علاقہ میں جموں راجوری شاہرہ پر ٹھالکہ کے مقام پر پولیس چوکی کے پاس تین مشکوک افراد کو دیکھا گیا ہے جو ایک موٹر سائیکل پر سوار تھے ۔
اطلاع کے مطابق چند لوگوں نے ان کے پیچھے گاڑی لیکر پکڑنے کی کوشش کی تاہم جب وہ پولیس چوکی کے پاس پہنچنے تو انہوں نے موٹر سائیکل سے چھلانگ لگا کر بھاگ گئے۔
وہیں اطلاع ملتے ہی سکیورٹی فورسز نے علاقہ کو محاصرے میں لیا اور حملہ آوروں کی تلاش شروع کی ہے۔ اس دوران ایک ویڈیو بھی وائرل ہوا جس میں ایک شخص کہہ رہا ہے کہ ان لوگوں کے پاس ہتھیار بھی ہے۔
پورے جموں ڈویژن میں ہائی الرٹ کا اعلان کر دیا گیا ہے۔ اس کے پیش نظر سیکورٹی کے سخت انتظامات کئے گئے ہیں۔ سیکورٹی فورسز سرحدی علاقوں اور دور دراز دیہاتوں تک چوکس ہیں۔ رات کا کرفیو بھی نافذ کردیا گیا ہے۔ سیکورٹی فورسز کی جانب سے مختلف علاقوں میں مسلسل سرچ آپریشن جاری ہے۔ اس مہم کے تحت نوشہرہ میں پولیس چیکنگ کر رہی تھی کہ ملزمان ناکے توڑ کر فرار ہو گئے۔
بتادیں کہ سرحدی ضلع راجوری کے ڈونگری علاقہ میں اتوار کی شام مشتبہ عسکریت پسندوں نے تین رہائشی مکانوں میں گھس کر اندھا دھند فائرنگ کی ۔ اس حملے میں چار افراد ہلاک جبکہ کئی افراد زخمی ہوئے ہے۔ پیر کی صبح تقریباً 9 بجے علاقہ میں ایک دھماکہ ہوا۔ اس دھماکہ میں دو کمسن بچے ہلاک جبکہ دو بچوں سمیت چار افراد زخمی ہوئے تھے۔
