امت نیوز ڈیسک //
سرینگر/ 20جنوری/ حکومت ہند کی طرف سے شروع کیے گئے ملک گیر ملازمتوں کے میلے کے تیسرے مرحلے میں، وزیر اعظم جناب نریندر مودی کی صدارت میں 45 مقامات پر منعقد پروگراموں میں 71,000 نوجوانوں کو سرکاری محکموں اور تنظیموں میں ملازمتوں کے لیے تقرری لیٹر سونپے گئے۔ پروگرام کے ایک حصے کے طور پر، بھوپال میں زراعت اور کسانوں کی بہبود کے مرکزی وزیر جناب نریندر سنگھ تومر کی موجودگی میں ایک روزگار میلے کا انعقاد کیا گیا۔ روزگار میلہ روزگار پیدا کرنے کو اولین ترجیح دینے کے وزیر اعظم کے عہد کو پورا کرنے کی طرف ایک قدم ہے۔ روزگار میلہ روزگار پیدا کرنے میں ایک محرک کے طور پر کام کرے گا اور نوجوانوں کو بااختیار بنانے اور قومی ترقی میں شرکت کے لیے بامعنی مواقع فراہم کرے گا۔
وزیر اعظم مودی نے ویڈیو کانفرنس کے ذریعے ملازمتوں کے میلے سے خطاب کرتے ہوئے کہا کہ اس طرح کے باقاعدہ روزگار میلے ہماری حکومت کی پہچان بن چکے ہیں۔ اس سے پتہ چلتا ہے کہ ہماری حکومت اپنے عزم کو کیسے ثابت کرتی ہے۔ جناب مودی نے کہا کہ تقرری کے عمل میں بڑے پیمانے پر تبدیلی آئی ہے۔ سینٹرل سروسز میں تقرری کا عمل پہلے سے کہیں زیادہ مؤثر اور متعینہ وقت پر ہو گیا ہے۔ آج تقرری کے عمل میں شفافیت اور رفتار حکومت کے ہر کام میں نظر آتی ہے۔ شفاف طریقے سے تقرری اور ترقی نوجوانوں میں اعتماد پیدا کرتی ہے۔ یہ شفافیت انہیں بہتر طریقے سے مقابلہ کرنے کی ترغیب دیتی ہے۔ ہماری حکومت اس سمت میں مسلسل کام کر رہی ہے۔ انہوں نے کہا کہ یہ سال 2023 کا پہلا روزگار میلہ ہے، اس سال کا آغاز روشن مستقبل کی نئی امیدوں کے ساتھ ہوا ہے۔ تمام نوجوانوں اور ان کے خاندانوں کو مبارکباد دیتے ہوئے وزیر اعظم نے کہا کہ آنے والے دنوں میں مزید لاکھوں خاندانوں کو سرکاری ملازمتوں میں تقرری ملنے والی ہے۔
وزیر اعظم نے کہا کہ ملک میں بنیادی ڈھانچے کی ترقی کے مجموعی نقطہ نظر سے 8 سالوں میں روزگار کے لاکھوں مواقع پیدا ہوئے ہیں۔ بنیادی ڈھانچے میں 100 لاکھ کروڑ روپے کی سرمایہ کاری کی مثال دیتے ہوئے ، وزیر اعظم نے کہا کہ نئی سڑکوں یا ریلوے لائنوں کے ساتھ نئی منڈیاں کھلتی ہیں، جس سے کھیتوں سے اناج کی نقل و حمل بہت آسان ہو جاتی ہے، اس کے علاوہ سیاحت کو بھی فروغ ملتا ہے۔ ہر گاؤں کو براڈ بینڈ کنیکٹویٹی فراہم کرنے کے لیے بھارت-نیٹ پروجیکٹ کا حوالہ دیتے ہوئے، وزیر اعظم نے اس سے پیدا ہونے والے روزگار کے نئے مواقع پر روشنی ڈالی اور کہا کہ اس نے گاؤوں کو آن لائن خدمات فراہم کر کے انٹرپرینیورشپ کا ایک نیا شعبہ کھول دیا ہے۔ ٹائر-2 اور ٹائر-3 شہروں میں تیزی سے پھیلتے ہوئے اسٹارٹ اپ منظر نامے کا ذکر کرتے ہوئے جناب مودی نے کہا کہ اس کامیابی نے دنیا کے نوجوانوں کے لیے ایک نئی شناخت بنائی ہے۔ جناب مودی نے نو تعینات نوجوانوں سے اپیل کی کہ آپ کو سیکھنا ہوگا اور ملک کو آگے لے جانے کے قابل بنانا ہوگا۔
بھوپال میں محکمہ انکم ٹیکس کی طرف سے منعقدہ روزگار میلے میں مرکزی وزیر جناب تومر نے کہا کہ ہمارے ملک کی ایک بڑی آبادی نوجوانوں پر مشتمل ہے، اس لیے یہ کہنا مبالغہ آرائی نہیں ہو گا کہ ہندوستان ایک نوجوان ملک ہے اور نوجوانوں کی یہ توانائی ہندوستان کی طاقت بھی ہے اور یہ ذمہ داری حکومت کی ہے کہ وہ اس بات کو یقینی بنائے کہ اس وسائل کو تعمیری طور پر استعمال کیا جائے، لیکن ساتھ ہی ہم یہ بھی اچھی طرح جانتے ہیں کہ سرکاری نوکری معاش کے میدان میں ایک ناکافی ذریعہ ہے، حالانکہ اس کے لیے ہمارے ملک میں ایک ذہنیت پیدا کی گئی ہے۔سال 2014 سے مودی حکومت کے دور میں لاکھوں نوجوانوں کو نوکریاں ملی ہیں اور یہ سلسلہ مسلسل جاری ہے۔ جناب تومر نے کہا کہ جب ملک نوجوان ہے، ملک میں نوجوانوں کی طاقت ہے، تو اس وسائل کو بروئے کار لانا وقت کی ضرورت ہے اور یہی وجہ ہے کہ گزشتہ سال 15 اگست کو وزیر اعظم نے ایک سال میں 10 لاکھ لوگوں کو سرکاری نوکریاں فراہم کرنے کی مہم شروع کی تھی، جس کے تحت 22 اکتوبر 2022 کو وزیر اعظم جناب مودی کے ذریعہ روزگار میلہ کا پہلا مرحلہ شروع کیا گیا تھا، جس میں مختلف ریاستوں میں بیک وقت 75,000 تقرری لیٹر جاری کیے گئے تھے۔ دوسرا روزگار میلہ 22 نومبر 2022 کو ہوا جس میں 71,000 تقرری لیٹر دیے گئے اور اب یہ تیسرا روزگار میلہ ہے۔
جناب تومر نے کہا کہ حکومت ہند نے اس سمت میں کوششیں کی ہیں تاکہ پرائیویٹ سیکٹر میں بھی روزگار کے مواقع کی دستیابی کو بڑھایا جا سکے۔ حکومت کی باگ ڈور سنبھالنے کے بعد، وزیر اعظم نے خود روزگار کے میدان میں کام کرتے ہوئے نئی رفتار اور توانائی فراہم کی اور اسکل انڈیا مہم شروع کی، تاکہ بڑی تعداد میں ملازمتوں کی مانگ کو پورا کیا جا سکے۔ اس مقصد کے لیے ایک الگ وزارت بھی بنائی گئی۔ نوجوانوں کی بڑی تعداد ان سے مستفید ہوئی ہے۔ وزیر اعظم نے ایک کے بعد ایک پہل کی ہے جیسے ’میک ان انڈیا‘، ’آتم نربھار بھارت‘، 20 لاکھ کروڑ روپے کا پیکیج، آتم نربھر بھارت روزگار اسکیم، پردھان منتری مدرا یوجنا، غریب کلیان روزگار ابھیان، ڈیجیٹل انڈیا، زراعت کے میدان میں 10000 نئے ایف پی او شروع کرنا۔ یہ سب روزگار پیدا کر رہے ہیں، جس کا فائدہ نوجوان نسل کو مل رہا ہے۔ انہوں نے کہا کہ آج ہندوستان کی سیاسی طاقت اور وقار عالمی سطح پر بڑھ رہا ہے۔ آج آنے والی نسل کے لیے یہ امرت کال سنہری دور ہے۔ جب قوم اپنی آزادی کی صد سالہ سالگرہ منائے گی، ایک نیا ہندوستان ابھرے گا، قوم کو دنیا کی قیادت کرنے والی ایک نئی طاقت کے طور پر دیکھا جائے گا، یہ دھیرے دھیرے سب پر عیاں ہے۔ کووڈ کا انتظام بھی اس کی ایک مثال ہے۔ جناب تومر نے نوجوانوں پر زور دیا کہ وہ کل کے چیلنجوں کا سامنا کرتے ہوئے ہندوستان کو عالمی گرو بنائیں اور اپنی ملازمتیں جاری رکھتے ہوئے اس جذبے کو اپنائیں۔
وزیر اعظم نے روزگار میلہ میں بات چیت کی– روزگار میلہ میں وزیر اعظم کے ساتھ بات چیت کے دوران، مغربی بنگال سے تعلق رکھنے والی محترمہ سپربھا بسواس، جنہیں پنجاب نیشنل بینک کے لیے تقرری لیٹر ملا، نے جلد از جلد تقرری کی رسمی کارروائیوں کو مکمل کرنے اور انہیں قوم کی خدمت کرنے کا موقع فراہم کرنے کے لیے وزیر اعظم کا شکریہ ادا کیا۔ وزیراعظم نے ہر شعبے میں لڑکیوں کی ترقی پر اطمینان کا اظہار کیا۔ پروگرام کے دوران، جموں و کشمیر سے جناب فیصل شوکت شاہ (جونیئر اسسٹنٹ، این آئی ٹی، سرینگر)، منی پور سے محترمہ واہنی چونگ (ایمس، گوہاٹی میں نرسنگ آفیسر)، بہار سے خصوصی طور پر قابل جناب راجو کمار، (مشرقی ریلوے میں جونیئر انجینئر) اور تلنگانہ سے کنّمالا وامسی کرشنا (کول انڈیا لمیٹڈ میں مینجمنٹ ٹرینی) نے بھی وزیر اعظم سے بات چیت کی۔
