امت نیوز ڈیسک //
گاندربل : وسطی کشمیر کے گاندربل ضلع کے واسکورا علاقے میں ہفتہ کی صبح ایک 35 سالہ شخص کی لاش ملی۔ تفصیلات کے مطابق 35 سالہ شخص کی شناخت تاشوق احمد راتھر کے نام سے کی گئی ہے۔ وہ کنگن کا رہنے والا تھا، کل صبح واسکورہ علاقے میں بے ہوشی کی حالت میں پایا گیا تھا۔ تاشوق احمد راتھر کو فوری طور پر قریبی طبی مرکز لے جایا گیا، جہاں پہنچنے پر ڈاکٹروں نے اسے مردہ قرار دے دیا۔ ایک پولیس افسر نے واقعے کی تصدیق کرتے ہوئے کہا کہ پولیس نے واقعے کا نوٹس لے لیا ہے اور تحقیقات جاری ہیں اور متوفی کی لاش کو طبی اور قانونی کارروائی مکمل کرنے کے بعد لواحقین کے حوالے کردی گئی ہے۔ جب کہ اس معاملے کے بارے میں تحقیقات شروع کر دی گئی ہیں۔
واضح رہے کہ اس سے قبل بھی گاندربل کے ینگورا علاقے میں ایلوی ایگرو بریڈنگ فارم اینڈ ہیچری کے پاس ایک نوجوان مردہ پایا گیا تھا۔ پولیس کے مطابق مذکورہ نوجوان 24 ستمبر 2022 سے لاپتہ تھا جس کی لاش 15 اکتوبر کو ملی تھی۔ اس شخص کی شناخت محمد اقبال سلیم ساکن لار کے طور پر ہوئی تھی۔ وہیں پولیس نے لاش کو پوسٹ مارٹم کرنے کے بعد لواحقین کے حوالے کردی تھی۔ بہر حال تازہ معاملے میں تاشوق احمد راتھر کے موت کی وجہ معلوم نہیں ہے۔ جانچ کے بعد یہ بات سامنے آئے گی کہ متوفی کے ساتھ اصل میں کیا ہوا تھا۔
