امت نیوز ڈیسک //
جموں وکشمیر ایجوکیشن محکمہ کے پرنسپل سیکریٹری آلوک کمار نے واضح کیا ہے کہ یونین ٹریٹری میں حجاب یا عبایہ پر کوئی پابندی عائد نہیں ہے۔انہوں نے مزید کہاکہ وشیو بھارتی سکول کی پرنسپل نے اس حوالے سے کوئی آرڈر نہیں نکالا۔آلوک کمار کا کہنا تھا کہ وردی کے اوپر طالبات جو بھی پہنیں انہیں اس کی پوری اجازت ہے۔ان باتوں کا اظہار موصوف نے نیوز پورٹل کے ساتھ بات چیت کے دوران کیا۔
انہوں نے کہاکہ جموں وکشمیر میں حجاب یا عبایہ پر کوئی پابندی عائد نہیں کی گئی ہے۔وشیو بھارتیہ اسکول میں عبایہ پر پابندی عائد کرنے کے بارے میں پوچھے گئے سوال کے جواب میں پرنسپل سیکریٹری ایجوکیشن ڈپارٹمنٹ آلوک کمار نے بتایا کہ اس حوالے سے کوئی آرڈر نہیں نکالا گیا۔انہوں نے کہاکہ جوں ہی یہ معاملہ سامنے آیا ہم نے اس کا نوٹس لیا اور فوری طورپر پرنسپل اور اسکول انتظامیہ کے ساتھ بات کی۔ان کے مطابق اسکول پرنسپل نے حجاب یا عبایہ پر کوئی پابندی عائد نہیں کی اور نہ ہی اسکول انتظامیہ کی جانب سے اس حوالے سے کوئی آرڈر نکالا گیا۔
موصوف پرنسپل سیکریٹری کا کہنا تھا کہ حجاب یا عبایہ کے نیچے اسکول وردی پہننا لازمی ہے اور یہ کوئی غلط بات نہیں.ان کے مطابق ہم یہ واضح کرنا چاہتے ہیں حجاب یا عبایہ پر کوئی پابندی عائد نہیں اور طالبات وردی کے اوپر جو بھی پہننا چاہتے ہیں انہیں اس کی پوری آزادی حاصل ہے۔گنڈ حسی بٹ میں پرنسپل کی گرفتاری کے بارے میں پوچھے گئے سوال کے جواب میں آلوک کمار نے بتایا کہ یہ شرمندگی کی بات ہے کہ پرنسپل کو اس طرح کے الزام میں گرفتار کیا گیا۔انہوں نے کہاکہ پولیس نے معاملے کی فوری کارروائی عمل میں لا کر پرنسپل کو حراست یں لیا ہے۔انہوں نے مزید کہاکہ مستقبل میں ایسا کوئی واقع پیش نہ آئے اس کے لئے اقدامات اٹھائے جارہے ہیں۔
