امت نیوز ڈیسک //
شوپیاں:جموں کشمیر تحقیقاتی ایجنسی (ایس آئی اے) نے رواں برس فروری میں بینک گارڈ سنجے شرما کے قتل کے سلسلے میں اپنی جاری تحقیقات کے تحت جنوبی کشمیر کے متعدد مقامات پر پیر کی صبح چھاپہ مار کارروائی کا سلسلہ شروع کیا۔ ذرائع کے مطابق ضلع پلوامہ کے اے ٹی ایم گارڈ سنجے شرما کے قتل کے سلسلے میں ایس آئی اے کی جانب سے ایف آئی آر زیر نمبر 14/2023 کے سلسلے میں یہ چھاپہ مار کارروائی انجام دی جا رہی ہے، جس کے تحت شوپیاں، کولگام اور اننت ناگ اضلاع کے مختلف مقامات پر چھاپے مارے جا رہے ہیں۔ قیموہ کولگام، ہیف شوپیاں، اننت ناگ قصبہ اشاجی پورہ ، گوریون بجبہاڑہ اور جنوبی کشمیر کے دیگر مقامات پر تلاشی کارروائیاں جاری ہیں۔
خصوصی عدالت کی جانب سے جاری کردہ سرچ وارنٹ کی بنیاد پر کی گئیں۔ یہ مقدمہ ابتدائی طور پر پلوامہ پولیس کے دائرہ اختیار میں آتا تھا تاہم مزید تفتیش کے لیے کیس کو ایس آئی اے کشمیر کے حوالے کیا گیا۔ واضح رہے کہ وادی کشمیر میں مختلف معاملات میں قومی تحقیقاتی ایجنسی اور ریاستی تحقیقاتی ایجنسی کی جانب سے کئی مرتبہ چھاپے مارے گئے ہیں اور اس ضمن میں متعدد افراد کو گرفتار بھی کیا گیا ہے۔
