امت نیوز ڈیسک //
آگرہ: آئی سی سی کرکٹ ورلڈ کپ 2023 کی ٹرافی بدھ کو تاج محل پہنچی، جہاں ٹرافی کو تاج محل کے سامنے رکھ کر ویڈیوز بھی شوٹ کئے گئے۔ کرکٹ ورلڈ کپ 5 اکتوبر سے بھارت کی میزبانی میں شروع ہونے جا رہا ہے۔ کرکٹ کے سب سے بڑے ایونٹ سے قبل انٹرنیشنل کرکٹ کونسل (آئی سی سی) نے پروموشن کی تیاریاں شروع کر دی ہیں۔ اب تقریب میں 50 دن سے بھی کم وقت رہ گئے ہیں۔ ایسے میں اس کی تشہیر کی تیاریاں بھی تیز ہو گئی ہیں۔
اسی سلسلے میں بدھ کی صبح تقریباً 7.30 بجے کچھ لوگ اپنے ہاتھوں میں چمکتی ہوئی ٹرافی لیے تاج محل پہنچے۔ یہ ٹرافی تاج محل کے ویڈیو شوٹ پلیٹ فارم پر رکھی گئی۔ تاج محل میں آئی سی سی ورلڈ کپ 2023 کی چمکتی ہوئی ٹرافی کے نظارے نے لوگوں میں تجسس پیدا کر دیا۔ٹرافی کی شوٹنگ تقریباً ایک گھنٹے تک جاری رہی۔ تاج محل کے تحفظ کے معاون شہزادہ واجپئی نے بتایا کہ ٹرافی کی شوٹنگ کے حوالے سے آئی سی سی سے اجازت طلب کی گئی تھی۔ شوٹنگ تقریباً ایک گھنٹے تک جاری رہی۔ تاج محل میں شوٹنگ ختم ہونے کے بعد ٹرافی کے ساتھ سیلفیاں لینے اور ویڈیو بنانے کے لیے سیاحوں کا رش تھا۔ سکیورٹی اہلکاروں نے بڑی مشکل سے لوگوں کو سنبھالا۔ لوگوں نے دور سے تصاویر اور ویڈیو شوٹ کئے۔
واضح رہے کہ کرکٹ ورلڈ کپ 5 اکتوبر سے شروع ہو رہا ہے اور بھارتی کرکٹ ٹیم ورلڈ کپ میں اپنا پہلا میچ آسٹریلیا کے ساتھ کھیلے گی۔ بھارت اور آسٹریلیا کے درمیان یہ میچ 8 اکتوبر کو چنئی میں کھیلا جائے گا اس کے بعد بھارت اور پاکستان کے درمیان میچ 14 اکتوبر کو احمد آباد کے نریندر مودی اسٹیڈیم میں کھیلا جائے گا”۔
