امت نیوز ڈیسک //
راجوری: سرحدی ضلع راجوری کے کالاکوٹ برمنڈل کے برو علاقے میں عسکریت پسندوں پر نظر رکھنے کے لیے بڑے پیمانے پر آپریشن جاری ہے۔ کچھ نامعلوم افراد کی نقل و حرکت کے بارے میں مخصوص انٹیلی جنس کے ذریعے سیکورٹی فورس کو اطلاع ملی تھی، جس کے بعد اس علاقہ میں بڑے پیمانے پر سرچ آپریشن جاری ہے۔ وہیں اطلاعات کے مطابق ابتدائی فائرنگ کے تبادلے میں دو فوجی اہلکار زخمی ہوئے ہیں جنہیں علاج کے لیے اسپتال منتقل کیا گیا جہاں انکی حالت خطرے سے باہر بتائی جاتی ہے۔
بتادیں گزشتہ روز اس علاقہ میں فائرنگ کی آواز بھی سنی گئی تھی۔ اس لیے لگاتار بھارتی فوج اور جموں و کشمیر پولیس نے کالاکوٹ کے علاقے میں مشترکہ آپریشن جاری کر رکھا ہے۔ عسکریت پسندوں پر نظر رکھنے کے لیے ٹیکنالوجی کا سہارا لیتے ہوئے، اس وقت شدید کاروائیاں جاری ہیں۔ گزشتہ ماہ 13 ستمبر کو راجوری ضلع میں دو عسکریت پسند مارے گئے تھے۔
