امت نیوز ڈیسک //
دہلی: کانگریس لیڈر راہل گاندھی نے جموں و کشمیر کے سابق گورنر ستیہ پال ملک سے بات کی ہے۔ گفتگو کی ایک ویڈیو منظر عام پر آئی، جس میں ستیہ پال پلوامہ حملہ، اڈانی مسئلہ، کسان تحریک اور اگنی ویر جیسے اہم مسائل پر راہل گاندھی سے بات چیت کر رہے ہیں۔ راہل گاندھی نے ان سے منی پور کے معاملے پر حکومت کے رویہ پر بھی تبادلہ خیال کیا۔
آپ کو بتا دیں کہ سابق گورنر ستیہ پال ملک پہلے ہی پلوامہ حملے اور دیگر مسائل کو لے کر مرکزی حکومت کے خلاف محاذ کھول چکے ہیں۔ انہوں نے مختلف پلیٹ فارمز سے حکومت کو گھیرنے کی کوشش کی۔ کانگریس لیڈر راہل نے اب ان تمام مسائل پر ملک سے آمنے سامنے بیٹھ کر بات کی۔ ایسا مانا جارہا ہے کہ دونوں رہنماؤں کی اہم مسائل پر بات چیت کا اثر پانچ ریاستوں میں ہونے والے اسمبلی انتخابات اور 2024 کے لوک سبھا انتخابات پر ہوگا اور بی جے پی کو اس کا نقصان ہوسکتا ہے۔سابق گورنر ستیہ پال ملک نے پلوامہ میں شہید فوجیوں کے معاملے میں مرکزی حکومت پر شدید الزامات عائد کئے۔ انہوں نے وزیر داخلہ امت شاہ پر براہ راست حملہ کیا۔ انہوں نے اس معاملہ کی صحیح انداز میں تحقیقات نہ کرانے کا الزام عائد کیا۔ انہوں نے کہا کہ اگر تحقیقات کی جاتی تو وزیر داخلہ کو استعفیٰ دینا پڑتا اور کئی افسران جیل میں ہوتے۔ واضح رہے کہ پلوامہ حملے میں 40 فوجی شہید ہوئے تھے۔
ملک نے کہا کہ جب یہ واقعہ ہوا تب وہ جموں و کشمیر کے گورنر تھے۔ انہوں نے کہاکہ جب کبھی سی آر پی ایف کے جوانوں کی نقل و حرکت ہوتی تھی تو ہمیں اطلاع دینے کے بجائے وزارت داخلہ کو مطلع کیا جاتا‘۰۔ ستیہ پال ملک نے الزام لگایا کہ پلوامہ معاملے میں انہیں اپنا منہ بند رکھنے کو کہا گیا تھا۔ حکمران جماعت نے تحقیقات نہیں کروائیں۔ ستیہ پال ملک نے یہ بھی الزام لگایا کہ انتخابات فوجیوں کی لاشوں پر لڑے گئے تھے۔
