امت نیوز ڈیسک //
پلوامہ:ڈائریکٹر جنرل آف پولیس کی جانب سے سخت وارننگ دئے جانے کے بعد وادی کشمیر کے دیگر اضلاع کی طرح جنوبی کشمیر کے ضلع پلوامہ میں بھی ڈسٹرکٹ مجسٹریٹ نے شہریوں سے سوشل میڈیا پر کسی بھی طرح کا ’غلط‘ مواد اپلوڈ کرنے سے باز رہنے کی ہدایت جاری کی ہے۔ ضلع مجسٹریٹ، پلوامہ، ڈاکٹر بشارت قیوم نے ایک حکم نامہ جاری کرتے ہوئے ضلع کے شہریوں سے ’’سوشل میڈیا، نیٹ ورکنگ پلیٹ فارمز کے ہر طرح کے غلط استعمال سے باز‘‘ رہنے کی تلقین کی۔
حکمنامہ میں کہا گیا ہے کہ ’’یہ حکم اس لیے جاری کیا جا رہا ہے کیونکہ یہ خدشہ ظاہر کیا جا رہا ہے کہ کچھ ملک دشمن عناصر یا گروہ، انٹرنیٹ خاص کر سوشل میڈیا نیٹ ورکنگ پلیٹ فارمز کا غلط استعمال کر رہے ہیں، جس میں خاص طور پر دہشت گرد اور علیحدگی پسند تنظیموں کے اشتعال انگیز پیغامات اور پروپیگنڈے کو ’فارورڈ‘ یا شیئر کرنا بھی شامل ہے۔‘‘
حکم نامے کے مطابق ’’سماجی رابطہ گاہ پر قابل اعتراض مواد اپلوڈ، فارورڈ، شیئر یا پوسٹ‘‘ کرنے والے کسی بھی شخص کے خلاف قانون کے مطابق کارروائی عمل میں لائی جائے گی۔ واضح رہے کہ ڈائریکٹر جنرل آف پولیس، آر آر سوین نے جموں میں پریس کانفرنس کے دوران لوگوں سے ’’مذہبی ہم آہنگی، بھائی چارے یا امن و امان کو زک پہچانے والے‘‘ کسی بھی پوسٹ یا مواد کو اپلوڈ کرنے سے باز رہنے کی تلقین کی تھی۔ یہ بیان اور احکامات این آئی ٹی، سرینگر میں احتجاج اور اس کے نتیجے میں رد عمل کے پس منظر میں جاری کیے گئے ہیں۔ یاد رہے کہ چند روز قبل این آئی ٹی میں زیر تعلیم ایک غیر مقامی باشندے نے پیغمبر اسلام صلی اللہ علیہ وسلم کی شان میں گستاخانہ ویڈیو اپلوڈ کیا تھا جس کے بعد طلبہ نے احتجاج کیا۔ طلبہ کے بعد مقامی باشندوں سمیت مذہبی رہنماؤں نے اس معاملے پر سخت برہمی کا اظہار کرتے ہوئے ملوث افراد کے خلاف قانونی کارروائی کا مطالبہ کیا تھا۔
