امت نیوز ڈیسک//
راجوری: جموں وکشمیر کے راجوری ضلع کے کوٹرنکہ علاقے سے تعلق رکھنے والے نوجوان کو سوشل میڈیا پر قابل اعتراض ویڈیو شیئر کرنے کی پادائش میں گرفتار کیا گیا ہے۔ پولیس ذرائع نے بتایا کہ راجوری پولیس نے سوشل میڈیا پر حساس ویڈیو شیئر کرکے ایک خاص طبقہ کے مذہبی جذبات کو ٹھیس پہنچانے کے الزام میں نوجوان کی گرفتاری عمل میں لا کر اسے سلاخوں کے پیچھے دھکیل دیا۔پولیس ذرائع نے ملزم کی شناخت محمد یاسر کے بطور کی ہے۔
پولیس نے اس غیر قانونی فعل کا سخت نوٹس لیتے ہوئے آئی پی سی کی دفعہ 153 اے، 295 اے اور 505 آئی ٹی ایکٹ کی دفعہ 57کے تحت پولیس تھانہ کنڈی میں مقدمہ درج کرکے تحقیقات شروع کی ہے۔
بتادیں کہ جموں وکشمیر کے پولیس سربراہ آر آر سوین کا کہنا ہے کہ سوشل میڈیا پر کسی بھی قسم کے ایسے ویڈیوز، ٹیکسٹ یا آڈیوز جو مذہبی جذبات کو ٹھیس پہنچنے یا امن و قانون کی صورتحال میں خلل ڈالنے کے باعث ہوں، پوسٹ کرنے والوں کے خلاف تحت قانون سخت کارروائی عمل میں لائی جائے گی۔ انہوں نے کہا کہ ایسے پوسٹوں کو شیئر کرنے والوں کو بھی قانون کے دائرے میں لایا جائے گا۔ان کا کہنا تھا کہ جموں وکشمیر پولیس کسی بھی شر پسند عنصر کو کسی کے مذہبی جذبات کو ٹھیس پہنچانے کی اجازت نہیں دے گی۔
(یو این آئی)
