امت نیوز ڈیسک//
چنڈی گڑھ: اولمپک میڈلسٹ اور مشہور ریسلر بجرنگ پونیا نے اپنا پدم شری ایوارڈ واپس کرنے کا اعلان کیا ہے۔ بجرنگ پونیا انڈین ریسلنگ ایسوسی ایشن کے صدر کے عہدے کے لیے سنجے سنگھ کے انتخاب سے ناراض ہیں۔ کیونکہ سنجے سنگھ سابق صدر برج بھوشن شرن سنگھ کے قریبی ہیں۔ بجرنگ پونیا بھی برج بھوشن سنگھ کے جنسی استحصال کیس میں خواتین پہلوانوں کے ساتھ لڑ رہے تھے۔ ڈبلیو ایف آئی کا صدر منتخب ہونے کے بعد برج بھوشن سنگھ کے حامیوں نے سنجے سنگھ کی جگہ برج بھوشن سنگھ کو ہار پہنا کر جشن بھی منایا۔
بجرنگ پونیا نے پدم شری واپس کرتے ہوئے وزیر اعظم نریندر مودی کو میں تین صفحات پر مشتم ایک خط بھی لکھا ہے۔ اس خط میں بجرنگ نے خواتین پہلوانوں اور برج بھوشن سنگھ کے ساتھ ہونے والی ناانصافی کے بارے میں اپنے درد کا اظہار کیا ہے۔ بجرنگ نے لکھا ہے کہ خواتین پہلوانوں کے ساتھ ہونے والی ناانصافی کے خلاف کوئی کارروائی نہیں کی گئی۔ ہمیں پبلک پلیٹ فارم پر پدم شری کہہ کر پکارا جاتا تھا لیکن اب اگر کوئی ہمیں اس لقب سے پکارے گا تو مجھے ناگوار گزرے گا۔ہر عورت باعزت زندگی گزارنا چاہتی ہے لیکن ان خواتین کو اس عزت سے محروم کر دیا گیا۔ اخیر میں پونیا نے لکھا کہ مجھے ایشور پر پورا یقین ہے، ان کے گھر دیر ہے لیکن اندھیر نہیں، ناانصافی پر ایک دن انصاف کی ضرور جیت ہوگی۔گزشتہ روز خاتون پہلوان ساکشی ملِک نے یہ کہہ کر ریسلنگ چھوڑنے کا اعلان کردیا تھا کہ ہم نے 40 دن سڑکوں پر احتجاج کیا اس دوران ملک کے کئی حصوں سے بہت سے لوگ ہماری حمایت کے لیے آئے۔ لیکن اگر برج بھوشن سنگھ کے بزنس پارٹنر اور قریبی ساتھی کو ڈبلیو ایف آئی کا صدر منتخب کیا جاتا ہے تو میں اب ریسلنگ کو چھوڑ رہی ہوں۔
واضح رہے کہ ریسلنگ فیڈریشن آف انڈیا (WFI) کے سابق صدر برج بھوشن شرن سنگھ کو عہدے سے ہٹائے جانے کے بعد ریسلنگ فیڈریشن کا انتخاب کیا گیا۔ جس میں فیڈریش کے سابق سربراہ برج بھوشن شرن سنگھ کے ہی قریبی سنجے سنگھ کو ریسلنگ فیڈریشن آف انڈیا کا نیا صدر منتخب کیا گیا ہے۔
